20021810
20021810


Chned wdycki, bo już łod dziołszyncych lot, niydziela przipodała mi za nojbardzij zgniyły i nojdugszy dziyń w tydniu. Zdowało mi się, że tych niydzielnych godzin od rana do wieczora je tuplowanie wiyncyj.Za bajtla to boło tak: rano śniodanie i wybiyranie się do kościoła, w połednie dobry łobiod, a po łobiedzie musowo dwie godziny spanio. Tego niy ciyrpiałach nojbardzij. Wiela razy trefiało tak, że na dworze piyknie świyciyło słońce, a my musiały leżeć cicho w pierzinach. Kiery sie szprajcowoł abo wygupioł przi tymu, tyn zaroz nachytoł. Jak my jakoś przetropiyli dwie godziny w łóżkach i jak my zjedli swaczyna, mogli my iść na plac. Jednak niydzielne zabawy niy boły takie fajne, jak te bez tydziyń. Przede wszystkim skuli tego, że mieli my połoblykane paradne lonty i strzewiki. Biada, jakby się kieryś z nos łopowożoł ścioprać. To niy boła żodno zabawa, jak musieli my na wszystko dować pozor. Beztóż mierzło nom się jak diosi. No bo tyż wiela to idzie szpacyrować po dziedzinie choćby jako sztajfiyra?Trocha niyskorzij, kiedy żech już boła ździybko starszo - za frele, tyż mi się mierzło w niydziele. Po cołkotydniowym szwongu w szkole niy poradziyłach tak nogle przihaltować. Brakowało mi szkolorskigo kamrajstwa, uczynio, pochanio. Na tyn jedyn dziyń wszystko musiało się wyciszyć. I choć doczkali my sie czasow, że w tydniu przipodały aże dwa dni wolnego, to i tak yno niydziela została tym zgniyłym dniym.Teraz, jak my som z Erwinym łoba na pynzyji, chned wszystkie dni w tydniu som dlo nos niydzielom. Żodyn nos niy goni z robotom, żodnymu się z niczym niy ścigo. Siedzymy w chałpie i zbijomy czas czym popadnie. Abo wynojdujymy se cosik do roboty, abo udowomy, że zaglondomy na telewizor. Pisza „udowomy”, bo niy wdycki je tam na co zaglondać. Porobiyli tych roztomajtych kanałów, żeby noród mioł w czym wybiyrać. Ale chocioż nikiedy knipsujymy po wszystkich programach za rajom, nic gyszpantnego znojść nikaj niy poradzymy. Pyk - piyrszy kanał - godo sześciu chopów o polityce. Tak co rychtich niy godajom, yno się wadzom. Jedyn drugigo przewrzaskuje i po sorońsku wstyrko się do cudzyj godki. Trzeba fest uszy szpicować i dować pozor, żeby z tyj swady spokopić, o co im się rychtik rozchodzi. Przeważnie jednak niy momy zmiyru tego słuchać i knipsujymy dalij. Pyk - leci jakiś brazyliski abo wenezuelski bandwurm. Poznowom je po tym, że te wszystkie Lusesity, Esperanie, Angele i Hulia majom inksze gymby i jakoś tako dziwoko godka. Pyk - szukom dalij coś gyszpantniyjszego na nastympnym kanale. Jakoś roześmiono paniczka zachwolo waflowy, filowany wyrfel i dowo nom skozać, że teraz w Polsce o poł dziesiontyj wszyjscy je jedzom. Po waflach przodzi dran na pile od bólu gowy i zupy z wrawyj szolki. Wszystkie reklamy łogromnie rod łoglondo Erwin. I niych by se łoglondoł. Niy ma żech zowistno, kiedy świdrzy z wybałuszonymi łoczami na mode frelki, kiere zachwolajom kryjmy, mydła i bindy ze skrzidełkami. Yno że, wiycie, mój chop je nikiedy choćby mały dziyć - co uwidzi na takij reklamie, to zaroz mu sie tego zachciywo. Niy, niy godom sam teraz o tych gryfnych frelach łod kryjmow, ale o maszkietach i jodle. To dostoł smaku na szekuladka, kiero pływała po mlyku, to na bomboniera abo zaś na jakiś ekstra sok czy inkszo lemuniada. Kieryś roz zachciało mu sie tyż jajca niyspodzianki, bo szpanowało go, co za graczki dowajom do pojstrzodka. Trocha boł zawiedziony, jak rozpuczył szekuladowe jajco, bo mioł tam jakigoś plastikowego podciepa w czerwonych badkach i dwoma bułami na wielkim łebie.Pykom dalij pilotym łod telewizora, bo teraz łon je nojważniyjszom „osobom” w chałpie. Na nastympnym kanale wadzom sie te same chopy, co na jedynce. Pyk - sztop! - woło Erwin, i zaglondomy bez jakiś czas na „Sztyrech pancernych”. Po nich przichodzi dran na dziynnik i nastympno dołza reklamy. I tak nom schodzi cołki dziyń. Dobrze, że miyndzy tym trza rychtować jodło, sprzontać i psa na szpacyr wykludzać. Inakszyj by my nom już downo zadki do zeslów przirosły.No, ale niy wszyjscy sie majom tak dobrze jak my. Niy wszystkim sie mierznie i zgniyli. Mocka je teraz ludzi, kierzi dziczom za pijondzym od rana do wieczora, od poniydziałku do soboty. Bez cołki tydziyń niy majom czasu żyć, bo ciynżko robiom. Dlo nich życie zaczyno sie dopiyro w niydziela, kiedy umiom łodreagować sześć poprzednich dni.

Komentarze

Dodaj komentarz