Ale maj niy yno skuli tego nom się podobo. Bo maj to czas maturowanio, chodzynio na majowe, no i przede wszystkim fajrowanio. Już na samym początku miesiąca trefiajom prawie za kupom dwa świynta, bez co noród robi se dugi szlustydziyń, nazywany i z amerykańska weekendym. Mocka ludzi bez te pora dni patrzy wytracić się z chałupy i pojechać z familijom do Wisły, Ustronia abo w jakieś inksze piykne miyjsca. My z Erwinym latoś nikaj niy wybzli, bo niy trefiyła się przileżytość, żeby kieryś z naszych przocieli przibroł nos do swojigo auta, no a cugiym niy chciało nom się kwanckać. Ale i tak nom się niy mierzło. W Rybniku je teraz tak piyknie, że momy kaj szpacyrować. Wdycki się tyż cosik gyszpantnego dzieje na rynku i inkszch kontkach miasta. Jak niy festyny, jarmarki, zawody, konkursy, to zaś lecyjakie wystympy bawiom i radujom rybniczonow. Do połowy maja mieli my tego mocka, bo nasze miasto fajrowało 800-lecie.No, ale to niy jedyne fajrowanie bez tyn miesiąc. Na maj przipodajom tyż fajery skirz piyrszych komunijow dziecek. Kożdyj niydzieli widać dziołszki w biołych szatach i winiuszkami na głowach i synkow w modrych ancużkach, jak ciągnom do kościoła na ta nojważniyjszo w ich życiu mszo. Za nimi paradnie idom jejich łojce, potki, ciotki, ujki, omy i opy z puketami kwiotkow.Kupa młodzioków w tym miesiącu musi zaś ciężko głowkować. Niby się godo, że kiedy kasztany zakwitnom, na nauka je już za późno. To tyż niy o nauka mi się rozchodzi, ale o nerwy i strach, jaki niesie za sobom matura. Zawsze w tym czasie wspominom se, kiedy i jo mazałach do egzaminacyjnyj sale wylękano jak zelter. Boło to tela lot tymu, a pamiyntom o maturze jak o czymsik wczorajszym
Komentarze