20022408
20022408


– Wy tak, starziku, dycko na sprzyk godocie, dyć bal dycko był okrongły. Przeca mi niy powiycie, że za waszych czasow grali kanciatym balym.– Widzisz, Kaziczku, wielaś sie niy pomylił. Jak jo był łeboniym, to my grali kanciatym balym. Były tyż bale skorzanne, ale komu stykło taki bal kupić? Sami my se bale szyli z takich skorzannych łatek, ryncznie dratwom szewieckom. Malowało sie tako szablona na skorze ze starych oficyrek (to tak godali my na boty z wysokimi cholewkami) – i potym sie to zeszywało. Dwie ostatni łatki miały taki dziurki na rzymiyń, kerym sie potym tyn bal zasznurowało. Ale nojprzod trza było ta uszyto hila łobrocić tym szewkami do pojstrzodka, wrazić blaza, nadmuchać luftu, swionzać tym rzymiyniym i już szło grać na pastwisku abo na jakim placu.– Co to jest blaza, starziku? Piyrsze słysza taki słowo.– Niy rob mi na śmiych, przeca to jest taki szlauch choby w kole, na kery gorole godajom dętka.– Teraz już wiym, bo szlauch to żech już w kole kedyś lepioł guminlyjzongiym. Niy rozumia yno, jak żeście pedzieli, że graliście kanciatym balym. Teraźniejsze bale tyż som szyte z takich łatek skorzannych.– Dyć żech ci prawiył, że my to sami se szyli. Jakby nom szewiec uszył, toby na pewno był tyn bal okrongły, ale tak to łon był kanciaty i ciynżki jak diosi. Jak byś potym widzioł te grani, tobyś sie dziepiyro uśmioł. Widzisz, że bal kulo sie ku ciebie, chcesz go świtnyć, a łon fuk na bok przed szłapom i ty zamiast do niego, kopiesz do luftu. Niyroz bramkorz go chce chycić, a bal roz w prawo, roz w lewo skokoł – jak żywy. Do tego bych ci musioł pedzieć, że miyndzy kretowinami my grali, to już wszystko wiysz.O szmaciannych balach to już ani niy wspominom, bo i tak niy uwierzisz. Stare pończochy sie sianym abo szmatami nabikowało, tak żeby to łokrongłe było, i tyż my takimi balami grali, a wiela uciechy przi tym było!To trza było umieć grać. Teraz, jak żech ci już pedzioł, to żodyn konszt w fuzbal grać. Jo bych tych naszych kadrowiczow puściył na taki boisko miyndzy kretowinami i dołbych im taki kanciaty bal, kerym jo grywoł z kamratami, toby dziepiyro mieli tryning. Na pewno by potym mistrzostwo zrobiyli...

Komentarze

Dodaj komentarz