– Juzaś ci byda musioł ta godka od targowiska zacznyć, bo to prawie w sobota sie zdarziło, w torg. Harypil był wtedy przi handlyrach, kerym dycko tam coś pomogoł, abo skrzinie z gymizom z fury na sztand prziniyść czy tyż stare liście poobrzinane wyniyść. Dostoł za te pomoganie jaki czeski piwo abo tyż co do zmaszkecynio. Prawie to było, jak sie piyrsze ogórki kiszone zaczły na torgu pokazować. Ta raciborzanka, keryj przeważnie pomogoł, dała mu za to tych młodych ogórków świyżo ukiszonych. Harypila sromotnie suszyło po wczorajszym i pedzioł, żeby mu tyż tyj kwaski z beczki naloła do gorczka. Wychlastoł z liter tyj wody, potym gyrcnył głośno, zebroł tytka tych małosolnych i ciśnie ku „Potaczni”, kaj sie dycko z tymi elwrami spotykali. Niy zaszoł ani ku rynku, jak go zamorziło haniebnie. Kańś przed Hotelym Polskim wloz do ajnfartu i gibko galoty spuszczo, bo już wydzierżeć niy poradziył. Jak już było tak daleko, żeby rzić utrzić, słyszy jakiś kroki po tretuarze. Dobrze znoł tyn klank, to żodyn inkszy, jak niy Berger, tyn som policyjant, kery mu sztyjc życi umiloł. Harypil gibko mycka z łepy i prask, przikrył drabko te rzodki nazwisko. Z biydom zdonżył galoty wdzioć i już sie Berger odzywo:– No coś to zaś zbrojił, Harypil...?– Nic takigo, panie wachmajster. Kanarek komuś musioł z klotki uciyc. Tu żech go dopod w ajnfarcie i czopkom prziczapił. Byście byli tacy dobrzi i przitrzimali na chwilka ta mycka, coby niy uciyk, a jo bez tyn czas skocza gibko po klotka tukej do ujca, kole Sladkiego.Berger yno fonsym poruszoł i doł sie skusić, schylił sie i trzimie ta czopka.– Yno sie uwiń, bo ni mom wiela czasu...!Zaroz byda nazod – pedzioł Harypil – i straciył sie za rogiym „Staryj aptyki”.Minyło sztwierć godziny, a Harypila ni ma. Berger niy wytrzimoł i pomalutku czopka dźwignył i łaps drugom rynkom gibko tego „kanarka”.– To mi już, starziku, dalij niy godejcie, na pewno sie musioł Harypil z Rybnika wykludzić?– Wykludzić sie borok niy wykludziył, ale niy chcioł byś być w jego skórze, jak go wachmajster łapnył.
Komentarze