– Niy robcie mie starziku za błozna – jaki jo tam król! Chocioż nasza nauczycielka od historie pedziała kedyś na lekcji, że mom miano królewskie i wszystkie dziołchy zaroz to chyciyły. Godajom w klasie „Krol Kazik” na mie.– To piyknie ci godajom, jo takigo miana fajnego w szkole niy mioł.– Jako wom godali, starziku?– Tego ci niy powiym, bo byś sie symie śmioł. Ty byś mog Kazik na banie za wajchowego robić.– Czemu?– Bo dycko ta naszo godka chcesz na inkszy glajz przeciepnyć, przeca teraz o ciebie godom i o wycieczce. Powiym ci, że w tym Kazimiyrzu jest rychtyk piyknie. Miasto leży nad Wisłom, kero mo w tym miejscu wysoki brzyg skalisty. Kościoł farski patrzy z wiyrchu na cołki rynek otoczony starymi kamiynicami. Na pojstrzodku rynku studnia stoji, z keryj tyn krol Kazimiyrz woda piył. Zaś na tych uliczkach pełno konstmalerów, kerzi te piykne zakątki na płótno przenoszom i turystom sprzedowajom.W tym kościele to ci som łorgany, takich żech jeszcze nikaj niy widzioł, chocioż my ze starkom dużo po rostolicznych wycieczkach pojeździyli.Ta nojgrubszo piszczołka to mi wyglondała choby „lutnia” na dole, kerom nom luft do przodka puszczali. Zbudowali te łorgany w 1620 roku, szkoda, że łone godać niy poradzom, na pewno by miały dużo do połosprowianio.Nad tym kościołym wysoko na gorze som ruiny zamku, w kerym tyn król Kazimiyrz przebywoł. Starka Regina tam już wylyść niy poradziyła, siedziała w ciyniu na rynku, ale jo jeszcze aż na baszta wyloz i chocioż mioł żech biyda wydychać, musioł żech młodym frelkom z naszyj wycieczki pokozać, że jeszcze poradza niyjedno.Przewodnik, kery nas po Kazimiyrzu obkludzoł, tela ciekawych rzeczy nom połosprowioł, ale jo yno jedno spamiyntoł, co mi sie podobało. Przedstow se, że tyn król Kazimiyrz wybudowoł na inkszyj gorze drugi zomek, kery podarowoł piyknyj żydówce o mianie Estera. Połączył oba zomki podziymnym, tajnym przyńściym, długim na trzi kilometry i co wieczor chodziył do piyknyj Esterki na zolyty.Niy myśl se, że skuli tych zolyt żech to spamiyntoł, a skuli tego, że możno mu tyn podziymny chodnik jaki śląski bergmony wybudowali, yno teraz niy wiym, czy już wtedy tacy byli. No ale gizd tyż musioł być z tego króla – żebyś sie yno Kazik na niego niy podoł...Z drugij strony, keby ci niy dali przi chrzcie Kazimierz, tobych ani niy wiedzioł, że taki piykne zakątki kajś isniejom.
Komentarze