– To wy myślicie, że ta woda jest jako zmaraszono abo jako zakażono? Tam szpecjalne filtry ta woda czyszczom sztyjc na okrągło. Takij czystyj wody to za młodu żeście na pewno nikaj niy widzieli.– Co ty mi tu Kazik za gupoty pociskosz? Czy ty wiysz, jako woda kiejsik w rzyce Rudzie abo w Nocynie leciała? Cołki czas bez lato ze synkami chodziyli my na rzyka Ruda sie kąpać. Były tam taki piykne miejsca, kaj czysty piosek nad brzegiym leżoł i głymboczyny tyż były taki, że poyntkować szło. Kole Wawoka tam była tako upusta, kaj stare koryto Rudy szło, „Sztyry klapy” na to godali i tam my przeważnie chodziyli yntkować. Przi kompaniu raków i ryb szło nachytać w tym miejscu, pełno okoni, ruzików i piskorzów tam w Rudzie pływało. Jak sie nom na rzyce zmierzło, to my na kąpielisko Ruda szli.To było kąpielisko z prawdziwom plażom pioskowom, a wody sie napić szło, co tako była czysto. Leżeli my se na tym wrawym piosku i co chwilka do wody wskakowali sie ochłodzić. Zaś w drugim stawie, za plażom od strony Paruszowca, rosły pałki wodne i mamałuszki, kere my cołki bukety targali i dziołchom robiyli kety na kark. W krzokach nad tym drugim stawym to my sie dycko przeblykali. Rostoliczne ptoki wodne tam sie gnioździyły w sitach, a te trzcinioki cołki czas nom śpiywały. Czuli my sie tak jak w raju. Żodnych ratowników niy było, ani żodnych biletów, Ruda była nasza, rozumisz?Po co komu był ratownik potrzebny – tam sie utopić niy szło, bo cołki stow szło po dnie przyńść aże ku Gliwickij.Niy taki cymyntowy grotek jak dzisioj, kaj wszyjscy sikajom i tyn pot zmywajom. Świat to widzioł tela narodu w takim grotku, jeszcze yno mie tam brakuje! Przipomino mi to czasy, jak żech durch mały był. Starzik nom dycko na placu stawioł grotek abo tako drzewianno waniynka, do keryj pełno wody ze studnie nanosiył. Musioł borok klukom naciągać ta woda ze studni, bo kołowrota jeszcze wtedy ni mieli. Potym sie ta woda musiała na słońcu nagrzoć, zanim nom dali wlyść do nij. Dzieci sie nazlatowało pełny plac i kożdy wlazowoł do tyj waniynki sie ochłodzić. Za chwila w wodzie pełno piosku było i sików na pewno, ale uciechy było co niymiara!
Komentarze