20023402
20023402


– Widzisz, zaprosiył mie tam moj kolega, od kerego łojciec do kupy z inkszym kamratym ta fojerwera założyli 75 lot tymu. Moga pedzieć, żech jest chneda tak stary jak łona.Te wszystki oficyjalne uroczystości to mieli do połednia kole rymize. Byli tam fojermony z wszystkich dzielnic Rybnika. Byli tyż nasi prezydynci z Rybnika i te nojważniejsze władze fojermańskie. Wiyszali zasłużonym strażakom medale na karku i przemówiynia kludziyli.Na tych sztandarach żech poczytoł, wiela to tych dzielnic już momy. Byli fojermony z Orzypowic, Wielopola, Grabownie, z Kuźnie, Golejowa... A co ci tu byda wymiynioł dalij, i tak wszystkich niy pamiyntom. Było tych sztandarow bez dwadzieścia. W kościele mieli mszo, to te poczty sztandarowe zajyny miejsce dookoła kościoła pod ścianami i z biydom sie zmieściyli.Po mszy poszli my na łobiod do szkoły. Cołki szczyńści, że szkole przibyła niydowno nowo sala gimnastyczno i było kaj tela ludzi pomieścić. Bez sto piyńćdziesiąt ludzi było na obiedzie.Po połedniu sie zaczon festyn na Karłowyj kympie. Ni mosz, Kazik, pojyńcio, jaki tam jest piykny widok z tego miejsca. Musisz tam kiedy symnom pojechać, to se obejrzisz. Cołko elektrownia i te lasy naokoło, wielki kyns Rybnika z bazylikom widać. Coś piyknego, tako panorama naszego miasta to na pewno z inkszego miejsca niy uwidzisz. Piykne jest nasze miasto niy yno z bliska, ale tyż z daleka.Jak te wszystki festynowe konkursy, kere tam dzieciom i starszym fojermany do kupy z radom dzielnice zafundowały żech obejrzoł, a na wieczór, jak zaczli do nieba puszczać te lojchtkugle, to mi sie zaroz przipomniały te festyny z mojich młodych lot. Na Rudzie dycko to było na Dni Morza abo tak jakoś sie to nazywało. Przeważnie kajś kole 24 czyrwnia, na Jana Chrzciciela. Nikere te zabawy przetrwały do dzisioj, jak na tyn przikłod lotanie w miechach, ciepanie ciynżarym kto najdalij, przecionganie liny, ale niy widzioł żech spinanio na maszt po winiec wusztu i halba abo siłowani na rynce. No ale idzie pedzieć, co nojważniyjsze, taki festyn to ludzi jednak z chałupy na świyży luft wyciągnie i odmłodzi. Potańcować sie idzie przi piyknyj muzyczce i poklachać ze znajomymi przi zimnym piwku.

Komentarze

Dodaj komentarz