20024305
20024305


– Bo widzisz Kazik, wspomniało mi sie swojski masło, taki jak żech za dziecka jodoł. Niyroz człowiekowi przidzie chyńć na coś, czego już tak pryndko niy poradzi do końca dokludzić i yno powspominać mu trefi.Ta pamiyńć ci niy do potym spokoju i musisz se to przipominać i sztyjc to wraco do ciebie. Szukosz potym tego piyknego woniu apluzyny, czekulady keroś dostoł pod chojinka, abo na piąte, czy szoste urodziny. Czasym ci przidzie smak na chlyb, kery tam ktoś w swojskim piekaroku upiyk i starka ci tyn krajczek poszmarowała szpyrkom, abo swojskim masłym. Szpyrka to tam idzie jeszcze samymu wyskwarzić i z cebulkom przibronotnionom wloć do boncloka, a potym se chrubo krajiczek czornego chleba poszmarować. Gorzij jest ze swojskim masłym, takim co za dziecka mamulka z torgu od baby ze wsi kupiyła. Zanim go kupiyła, to nojprzod cołki torg obleciała i u kożdyj baby musiała go nejprzod skosztować. Jedne to miały te masło trocha za blade, drugie trocha za słone, a jeszcze inksze źle wyrobione. Jak już sie mamulka smogła kupić taki połfontek tego masła, to było nojlepsze, nojtońsze i oko sie radowało, jak sie go do maselniczki wraziyło. Te piykne wzory na tym kłopetku masła, tego opisać niy idzie. Rostoliczne kwiotki, listeczki i szlaczki, aż żol go było zacznyć nożym i na chlyb szmarować.Jo tego niy zapomna, bo jo na wsi miyszkoł i dycko mamulka brała taki masło u jednyj gospodyni, keryj Ana było. Była to "rzitelno" baba o gołymbim sercu. Miała ta Ana synka, kerymu Zefek było na miano i śnim, chocioż był pora lot starszy odymie, żech sie cołki czas kamraciył. Mieli tyż dwie krowy, konia i inkszyj gowiedzi pełno, tak jak to dycko na wsi było. Była to rodzina zocnych siedlokow.Rod żech się prziglondoł, jak Zefek Siwka oporządzoł. Podowoł żech mu dycko kartacz, abo szkrobaczka. Niyroz tyż Gwiazdule i Krasule my paśli na łąkach pod lasym. Jak my te krowy na wieczor dudom przignali, to dycko żech dostoł od Any krajczek taki długi, żech go musioł dwiema rynkami trzimać, bo to był z łokrągłego chleba, kery godzina tymu był z piekaroka wyciągnyty. Zefek to dycko dostowoł skrowek, ale Ana mu go tak grubo niy szmarowała. To łon wzion cołko pojszczotka wydłuboł i zjod, potym se som do tego korytka masła nakłod. Jak to potym swojimi wielkimi, zdrowymi zymbiskami chrustoł, to yno trzoski leciały mu z tego skrowka.O świyżym chlebie swojskim z piekaroka, to nima co godać. Kery go niy jod, niy wiy jak chrupie wongel drzewny miyndzy zymbami. Był łon w spodnij skorce powciskany, bo w piekaroku sie drzewym hajcowało i potym takom gracom sie wybiyrało tyn glut. Wszystkigo niy dało sie rady wygrzynyć i bestoż sie znojd na dolnij stronie pecynka chleba.– Już mi dalij starziku niy godejcie, bo mi sie tyż zachciało takigo chleba ze swojskim masłym.

Komentarze

Dodaj komentarz