jednyj szło przeczytać niewyraźne monogramy M.S. Godali ludzie, że w nij leżała młodo dziołcha, cera od wielkigo bogocza rybnickigo, keryj łojcowie wzbroniali wydać sie za piyknego, ale z biydnyj rodziny synka. Było mu Roman, a łonyj Małgorzata. Spotykali sie dycko wieczorami i szpacyrowali nad rzykom Rudom, kajś miyndzy Wawokiym i Wielopolym. Coż z tego, że sie tak fest przoli, kiej łojcowie wzbraniali. Kiedyś tyn potajymny szpacyr zakończył sie tragicznie i kochankowie zastrzelili sie nad Rudom. Małgola została pochowano na starym cmyntorzu, w rodzinnym grobowcu, a Romka zasuli w sosnowyj trule na nowym kerchowie i żodyn dzisioj niy wiy, w kerym miejscu. Od tego czasu co jakiś czas zaczła sie pokazować po cimoku na łobuch rybnickich kerchowach, tako wysoko baba, łobleczono po czornu. Żodyn, kery jom trefiył, niy widzioł jeji gymby, dycko miała jom fest odzioto czornym plyjtym.Czornom Małgolom jom nazwali ludzie. Bez mała tak do dzisioj chodzi, roz po starym, roz po nowym kerchowie.Jo był małym bajtlym, jak już ta Małgola straszyła, bo to już tymu bydzie przeszło sto lot, jak sie zastrzelili wtedy nad Rudom.Roz mojij starce sie pokozała na nowym kerchowie. Byli wtedy starka z kwiotkami, przi swojij mamulce, a że to było tyż o takim czasie w poźno jesiyń, to ich cimok chyciył roz-dwa. Stoli i rzykali nad grobym, a tu łoroz ktoś i ze zadku zimno rynka na ramiyniu położył. Starki sie zdało krymfy chycom, ale taki młody głos sie odzywo do nij: „Dejcie mi, paniczko, jedyn kwiotek, taki tyn nojmyjnszy czerwony dąbek, prziszłach odwiedzić mojigo kochanego synka, a ni mom żodnego kwiotka...”.Starka sie obejrzeli i drabko jedyn czerwony kwiotek dali tyj dziołsze do wyciongnytyj, blank biołyj rynki. Ta yno pedziała „Bóg zapłać...” i po cichutku straciyła sie gibko miyndzy grobami.Starka długo pamiyntali te spotkanie z Czornom Małgolom.– Skąd wasza starka mogła wiedzieć, że to była łona? To mogła być rychtyk jako dziołcha, kero kogoś prziszła odwiedzić.– Nasi starka sie tam nigdy niy mylili, przeca jak sie łobrociyli, to wcale niy widzieli gymby od nij, bo była cołko zasłoniynto.Czornyj Małgole wiyncyj ludzi na rybnickim kerchowie spotkało i tyż przeważnie kwiotki wychcowała. Toż pamiyntej, Kaziczku, nigdy niy chodź na kerchow bez kwiotkow, bo co by to było, jakbyś jom trefiył?
Komentarze