20025106
20025106


Pamiyntom, jak dycko nasi starziki z kościoła prziszli po pastyrce, to prosto do chlywa szli i pogadowali se ze swojim bydłym. Starzik godoł z koniami, a starka z krowkami. Niyroz sie starzik czerwiyniył przed starkom, jak mu Siwek swoji pedzioł. Wszystko na starzika wywołoł, a to, że jak jechoł z pełnym wozym wonglo z gruby, to pod gorka, zamiast mu pomoc i pociś trocha, to siedzioł na wozie i jeszcze biczym mu kole ucha śmigoł. Roz starzik popijoł przez dwie godziny piwo w szynku z inkszymi formanami, a łonego prziwionzoł łopratami do gelyndra w pełnym słońcu i na dokłodka ani wody mu niy doł, kiedy som zimne piwko se z kufki pociongoł. Pamiyntom, jak sie wtedy starka gorszyła, wyszło, że jom cyganiył, że tako długo raja była na wodze przi grubie. Dopiyro we Wilijo sie prowdy od Siwka dowiedziała.Roz tyż Krasula sie na ujca Stanika poskarżyła, jak jom na pastwisku do kolika prziwionzoł w takim miejscu, kaj same szczoty rosły i żrać nic ni miała, a łon bez tyn czas groł ze synkami we fuzbal zamiast jom paść. Wszystko zwierzina we Wilijo połosprowiała, to my dycko strach mieli, jak już starziki szli śniom pogodać po pastyrce. Stanik to dycko nojwiyncyj wystoł, bo łon przeważnie posoł krowy i odbywoł cołko gowiydź. Żeby na niego nic złego niy pedziały krowy, to już tydziyń przed Wilijom przichlybioł sie im i znosiył im do żłoba kłaki, ćwikiel abo inksze maszkiety, jak jabka i markus.Jo tyż tam niy był lepszy od Stanika, wiela razy żech tyż wyrzondził co złego zwierzinie, za coch po świyntach niyroz od tatulka chiby zebroł, a wszystko przez to, że łona roz w roku umi godać, a człowiek o tym zapomino.- Co jo to słysza, starziku, dyć zawsze żeście godali, że taki porządny jak wyście byli, to mało kto.- Coś mi kiedyś ujec wspominoł, jak żeście łoba dwa nachytali od waszego tatulka skuli jakigoś kota. Co to było?- Widzisz, tyż by o tym żodyn niy wiedzioł, keby tyn gupi kot we Wilijo niy pogodoł wszystkigo swojij właścicielce, a naszyj somsiadce Materzoczce. Wszystkimu wtedy Stanik był winiyn, bo łon dycko mioł taki dziki pomyślunki. Chyciyli my kota od Materzoczki i prziwionzali mu do łogona sucho, nadmuchano pacharzina ze świnie, do keryj my pora ziorek grochu wciepali. U Materzokow prawie wtedy szkubaczki piyrze szkubały, jak my go na wieczor na jejich plac puściyli. Możesz se przedstawić, co sie dzioło, jak tyn wylynkany kot wparził do tyj izby przez uchylone łokno. Żodyn by do dzisioj niy wiedzioł, że to była nasza sprawka, keby tyn gupi kot tego niy wywołoł. Od tego czasu mi żodyn niy powiy, że we Wilijo zwierzina godać niy poradzi...

Komentarze

Dodaj komentarz