20025202
20025202


- Dyć, starziku, wyście niy byli lepsi, przeca sami żeście łoński rok nom opowiadali, jak to strzylaliście putniami we Wilijo i sylwestra.- Ja, ale żodnymu przi tym pazurow niy urwało ani niy poparziło. Łońskigo roku, jak żech na naszym rynku był, to jednyj babie wpadła lojchtkugla za kragel i cołko jom poparziło, a o tych pazurach pokalyczonych to już ani niy godom.Te nasze strzylanie karbitym to było piykne i głośne. Brało sie prozno biksa po lakfarbie i dziura sie robiyło gwoździym w dnie, potym sie do pojstrzodka wciepało bryłka karbidu, napluło sie na nia i gibko deklym zawarło. Potym sie jom położyło na ziym, przidepło nogom i sztrajcheclym ze zadku, kaj ta dziurka, zapolyło. Zadudniało choby z kanony i dekiel za kożdym razym lecioł pora metrow, że go sztyjc szukać trza było. Żodnymu sie przez to nic stać ni mogło, bo takij siły to ni mo, jak te petardy dzisiejsze. Dzisioj jak zacznom strzylać ze wszystkich stron i lojchtkugle puszczać, to boroki psy chcom wroz z budom uciekać.- No wiycie, starziku, ale świat idzie naprzod i dzisioj tam żodyn karbidym niy strzylo. Zresztom, skąd by tego karbitu wziońć, jak już żodyn karbidkami niy świyci?- No ja, to mosz recht, ale taki snople to niy powinni sie tymi fojercojgami bawić - niy byłoby tela tych wypadkow. Co roku yno w telewizorze o tym godajom, żeby tego bajtlom niy sprzedować, a jeszcze sie znejdom tacy starzi i gupi, co idom do sklepu, kupiom i dzieciom do pazurow dajom. Tego jednak piyrwyj niy było. To jest prowda, że my tyż rostomajnte breweryje w sylwestra robiyli, ale wszystko było z miarom i żodnymu my krziwdy niy zrobiyli.- Niy zrobiyli? A co żescie Pytliczce ze stodołom zrobiyli, już niy pamiyntocie? Dobrze, że starka mi to połosprowiała, boby kto pomyśloł, żeście świyńci byli.- To była inkszo sprawa. Skąd my mieli wiedzieć, że Pytliczka mo na stodole dach przegnity, to niy była nasza wina.Dycko sie taki rzeczy robiyło w noc sylwestrowo, jak sie z muzyki szło. Przynsła z płota sie wyjyno abo wrota i wynosiło sie do zumiynt na pole, kaj sie z tego tako buda stawiało. Wiela razy my Hanysowi z podlesio drabiniok porozbiyrali i na stodole go potym poskłodali. Wiysz, co to śmiychu dycko było, jak w Nowy Rok szli ludzie do kościoła, a na stodole drabiniok stoł, dyszlym do kościoła droga pokazowoł, bo była sniegiym zasuto.No a z tom Pytlikowom stodołom to nom roz niy wyszło. Szło nas wtedy wiyncyj z muzyki i już pora płotow my powynosiyli bele kaj na pole abo droga my zaszperowali. Paul i Zefek, kerzi jeszcze mało mieli, snochwiyli, żeby od Pytliczki haziel na stodoła wyniyść. Dwa razy nom niy trza było godać, Stanik zaroz do placu za stodoła szoł, jo i cołko reszta za nim. Stoł tam haziel stary, kery sie cołki chwioł i niy trza było wiela nim narówać. Paul i Zefek wskoczyli na szopiec, a potym na stodoła. Jo i Stanik podali my im tyn haziel, kery był lekki jak piorko, musioł ze samych okorkow być zrobiony. Za chwila już stoł haziel na stodole. Wszystko by było dobrze, keby Zefek niy ujrzoł straszka na wroble, kery stoł pod okapym. - Dej go sam yno - zawołoł po cichu na mie i jo zaroz łap straszka na szopiec i dalij śnim na stodoła. Stanik tyż za mnom wali na wiyrch. Wraziyli my tego straszka do tego haźla, że niby starego Pytlika bydzie udowoł i jak ludzie rano pójdom do kościoła, to go bydom widzieć. Dźwiyrze my w haźlu dokorząd otwarli, ale kapli my sie, że pokazuje ku lesie i zaczli my obracać tak, coby ku drodze pokazowoł. Już wiela niy brakowało i byłoby po fertiku, ale Paul sie zaczon śmioć, a wiysz, wiela łon wożył, możno ze trzi cynty. Jak sie mu brzuch ze smiychu zaczon ruszać, to my czuli, jak tyn dach chodzi. Yno momynt to trwało i we czworka znojdli my sie na gumnie w stodole, a haźlym my byli przikryci.Po Nowym Roku cołko połodziyrano czworka rojbrow stawiała nowy haziel Pytlikom i naprawiała dach w stodole...

Komentarze

Dodaj komentarz