No, ale niy wszystko szło w nij myć. Jak farorz mioł gości, na stół stawiało się stare, pozłocane serwisy, strzybne byszteki i ciyniuśkie szkło na dugich szłapkach. Tych szkorup niy godziyło się pomywać w waszmaszynie (czamu – po dzisiok niy wiym). Trza się boło z nimi obchodzić jak z malowanym jajcym. Ręczyska mi świyrgotały, bo miałach strach, że cosik się potrzasko abo przi łociyraniu do sucha popuko. Łodciągli by mi potym ta szkoda z geltaku. A że takie „zabytkowe” szkorupy som fest zocne, straciyłabych niymało zarobionych ojrokow. Na swoje szczęście bez cołkie dwa miesiące niczego z tych rzeczy niy zniszczyłach.Ja, doczkejcie – strzaskałach! Piłsudskigo! Takie popiersie z porcelany. Stoło w kuchni na fynsterbrecie. Po mojimu dość niyherski plac dlo naszego wodza. Ale to rzecz gustu, prowda? Kieryś dziyń myłach łokno i niyszczynśliwym trefym sztuchłach figurka. Niy, niy sleciała na dyliny. Łobalyła się yno. To jednakowóż stykło, by Piłsudskimu uleciała głowiczka. Dobrze, że moje chlebodawce tego niy widziały. Niy boło ich wtedy w doma. Ludkowie złoci, jak jo sie znerwowałach! Mało brakowało, a trefiołby mie hercszlag. Na szczęście głowa wodza niy roztrzaskała się na konski, yno uleciała tak choćby kto nożym uwalył. Mogłach jom z powodzyniym nazot zastyrczyć na karku. Niy boło poznać, że coś z popiersiym je lołs. Ale to mie wcale niy uspokojyło. Kożdy dziyń ciyrpłach, że ktosik może się o nie łotrzeć i głowa zaś sleci. Wtedy jak nic moja „zbrodnio” wyszłaby na wiyrch. Spać po nocach niy poradziyłach skirz tego. Myślałach, jako by ta moja szkoda naprawić. Wiedziałach, że som teraz takie kleje, kiere zlepiom wszystko. No ja, ale na farze czegoś takigo niy znodłach. Pijyndzy tyż jeszcze niy miałach, żeby klyj kupić. A choćbych i miała, to niy poradziyłabych się w tych nimieckich sklepach wygodać i wytuplikować sklepiorce, co potrzebuja. Z opresyji wybawiył mie kamrat, kiery już 15 lot miyszko w Niymcach. Zadzwonioł kiejsik i jo mu wtedy łopedziała o swoji starości. Łobiecoł kupić pasowny klyj i poskłodać na zicher Piłsudskigo. Słowa dotrzimoł, bo za pora dni przijechoł i niyszczynsno figurka zlepiył do kupy. Byda mu za to na wdycki wdzięczno.Miałach tyż na tyj farskij służbie trzi wypadki przi robocie. Przi jednym o mało palca niy złomałach. Ale o tym i jeszcze inkszych rzeczach nastympnym razym.
Komentarze