20031202
20031202


Teraz Kowoliczce roboty przibyło, dwoch synkow musiała obrobić i Hanysowi jedzynie szykować rano do roboty. Za dużo tego na roz miała. Emil na szczyńści niy był zmierzłym dzieckiym. Po cołkich dniach leżoł w kolybce, kero dostali od Anczynyj, siostry Zofijki. Konrad go musioł czynsto kolybać i nupel wstyrkać Emilkowi, jak go wypultnył. Czynsto se tyż tyn Emilow nupel som pomuldoł, jak sie żodyn niy patrzył.Było tyż tak, że cołki czas sie chcioł Emilek kolybać i wtedy Ana ni miała ani czasu kartofli na łobiod nastrugać. Zofijka i doradziyła, żeby se konszczek sznorki prziwionzała do kolybki i do swojij nogi. Rynce miała wtedy wolne i mogła yno nogom leko ruszać. Najgorzij, jak trza było do sklepu iść. Musiała wtedy od somsiadow dziołcha wołać, żeby synkow prziwachowała. Klarka od somsiadki, keryj było już dwanoście lot, chyntnie przichodziyła, bo tyż czynsto dostowała za to tyteczka szklokow od Kowoliczki. Ana dycko do Fifka chodziyła, bo to nojbliżyj miała. Gorzij, jak musiała na torg po gymiza iść, wtedy to delij twało. Boła sie ich za długo z Klarkom łostawić, bo tyż to był miglanc z tyj dziołchy. Wynochwiała rostomajnte bawiyni. Roz oparła o stoł bigelbret i kozała Konradowi sjyżdżać po nim. Pora razy sjechoł, a potym zaczon wrzeszczeć - ani by go kery ze skory obdziyroł. Przileciała zaroz z dołu wrazidlato Musioliczka, cołko wylynkano - co sie to u Kowolikow dzieje. Łokozało sie, że Konradowi wlazła drzizga do półrzitka. Ana tyż te larmo słyszała, bo już prawie była w siyni na dole. Choby na skrzidłach leciała drabko do gory, blado ze strachu. Skończyło sie to wszystko śmiychym na szczyńści.Jak Emilek poradziył som chodzić, to już było poł biydy. Brała go wtedy do szportlika i Konradek go cisnył przed niom. Cołki miasto wtedy poradziyli objechać. Roz to aż na Ruda zajechała śnimi. Tam za sztadionym był piykny szynk u Raincza, w kerym pili lemoniada, a potym jechali aż ku wodzie. Konrad sie pluskoł w wodzie, a Emilek sie pioskiym bawiył. Wtedy tyż sie dowiedzioł, jak piosek smakuje. Tela se do gymby naladowoł, że Kowoliczka strachu dostała. Emilek sie śmioł, choby sie nic niy stało, a z gymby wypluwoł cołki klompy zmiyszanego ze ślinom piosku. Tak tam wtedy zmitrynżyli, że Hanys bez łobiadu łostoł. Przijechali z tyj Rudy dopiyro po połedniu. Hanys sie dowiedzioł od Musioliczki, że ku Rudzie śli.Zjod yno dwa krajiczki chleba ze szpyrkom i poszoł do Złotyj Rybki na piwo.

Komentarze

Dodaj komentarz