20031302
20031302


Tak tyż jak prziszła du dom z tyj Rudy, niy starała sie bardzo, bo wiedziała, że na pewno zaś w szynku siedzi. Emilek już był taki zmochany, że yno na wiyrch wlyźli, to i już na rynkach usnył. Położyła go do łożka, a sama z Konradym zaglondała na browarski kumin, bo juzaś „Harypil” po nim łaziył. Z tym „Harypilym” to była dycko komedyjo. Niyroz loz na tyn kumin i robiył tam handsztandy, a na dole stoło pełno narodu i czekali yno, kedy łon spadnie. „Harypil” jednak niy spod, chocioż mało kedy tam czyrstwy wyłaziył. Jak śloz na doł, to zaroz go brali granatowi i na policyjo kludziyli. Sztrofy mu niy poradziyli dać, bo był bezrobotny. Wloli mu pora razy guminknyplym po puklu i puściyli. Za pora dni juzaś to samo było. Co mioł borok począć, jak go dycko suszyło i yno tym sposobym umioł na piwo i żymła z wusztym zarobić.***Emil rosnył jak na drożdżach, ani sie niy łobejrzeli, jak do szkoły zaczon chodzić.Potym nastały jeszcze gorsze czasy. Piniondze coroz mynij geldowały, a dziecka coroz wiyncyj jeść chciały. Coroz bardzij ludzie o wojnie godali i rostomajncie było. Tak jak to hebama przi narodzyniu Emila godała, tak było. Doczekali sie tyż w Rybniku wojny. Ci, co to przeżyli, wiedzom, jak to było i co sie w Rybniku dzioło. Ni ma co złego wspominać. Jedni ludzie z miasta sie wykludzali, inksi zaś sie przikludzali. Jedni musieli uciekać, inkszych zawiyrali - niy było wtedy wesoło.Hanys Kowolik sie nikaj niy wykludziył z naszych stron i dycko sie chwolił, że jest Ślązokiym.O jego starszym synku jednak tego pedzieć niy szło. Rącz yno Niymce wlyżli do Rybnika, Konrad doł sie przekabocić i do „hajotow” sie zapisoł, a zaniydługo go do wojska ściągli i na ostfront posłali. Zostoł jakimś onteroficyrym i fotografka posłoł du dom. Kowoliczka jom do romki wstyrczyła i na wertiku postawiyła kole świyntego Antoniczka. Kożdy dziyń rzykała za jego zdrowie i żeby cołki du dom przijechoł.Roz przijechoł na krotki urlop i gwołtym chcioł Emila tyż do „hajotow” zapisać, ale Hanys Kowolik łostro sie tymu sprzeciwiył. Tela larma w doma skuli tego było, że po złości Konrad odjechoł i ani sie znać po tym niy doł.Hanysa po jego odjeździe tyż do wojska wziyni. Do tyj chwile mioł spokoj, bo robiył za majstra we werku, kaj jakiś czyńści do kanonow dorobiali. Teraz se w duchu myśloł, że to Konrad mu załatwiył tyn order do nimieckigo wojska.Pod koniec wojny Emila tyż do nimieckigo wojska wziyni. Borok jeszcze osiymnoście lot niy skończył i Kowoliczka ślimtała jak diosi. Wszystkich chopow ściągli do wojska i teraz sama została.

Komentarze

Dodaj komentarz