20031704
20031704
Zaczło sie to w keroś Barborka. Sztajger, pod kierym robiył, zaprosiył wszystkich swojich hajerow na obiod do popiylowskigo szynku u Holony. Potym, jak już podpici byli, trza było sztajgra du dom odkludzić. Otwarła im dźwiyrze piykno, młodo frelka, cera sztajgrowa. Miała wtedy dziewiytnoście lot, a Emilowi już dwadzieścia sześć szło. Jak sie łoczami trefiyli, to już darymne było. Za rok zostoł Szkyrtek ziyńciym od swojigo sztajgra. Reginka była jedynoczkom i do tego szwarno jak sto diosi. Kamraci na grubie mu zowiściyli, bo kataćtam tako szykowno dziołcha, i do tego z chałupom, takigo bajtla se wziyna. Opowiadali na grubie, że farorz, jak im ślub mioł dować, padoł do klynczącego Szkyrtka: Cofnij sie syneczku, bo tu mody pon przidzie...


Niyroz tyż na dole Emila napasztowali: Kajś ty był, jak my rośli?, ale Szkyrtek był śnimi „fiksom-fertik” - jo rosnył w zegrodce jak płonka, a wy naisto w lesie miyndzy świyrczokami bez światła, bez to z was taki zawalate delongi porosły, kere potym łepami po kapach pierom, jak trza gibko ze ściany śmiatać.Rok po weselu Reginka urodziyła Szkyrtkowi cerka Anielka, potym za dwa roki drugo cera Helynka, coby na grubie niy godali co rok prorok. Ostatni prziszoł na świat Ziguś, kery tela Szkyrtkowi uciechy narobiył, że jednak Kowoliki niy wyginom. Co to zaś picio było w Barborce (to była pijalnia piwa przi grubie) a winszowanio! Jedni winszowali na syna, inksi sztajgrowi na starzika. Sztajgra to nawet podciepowali do gory - aż pod ordeka - tak długo, aż go potym zapomnieli chycić i potrzaskoł sie wtedy sromotnie. Śmioli sie tyż śniego kamraci, że trefi mu drugo chałupa stawiać, kiej takigo robotnego ziyńcia dostoł. Sztajger sie yno śmioł i padoł: Teraz moga se spokojnie na pynda iść, bo bydzie z kim sie bawić.Zanim jednak poszoł na pynzyjo, zdążył chałupa dźwignyć i na wiyrch sie wykludziył. Szkyrtkowi cołki doł zostawiył i dwie izby na wiyrchu. Dostała tyż Reginka auto od taty, kere dostoł kiedyś z gruby na talon górniczy. Było to NRD-owski P-70, „petka” godali na nie i Szkyrtek mioł czym teraz dzieci wozić. Prawie co niydziela kajś jeździyli na wycieczki. Nojwiyncyj do Wisły świyżym luftym podychać. Szwiger sie śmioł śnich, że jeżdżom sie yno wyjscać do Wisły i nazod.Dzieci sie dobrze chowały i ani sie Kowoliki niy obejrzeli, jak najstarszo Aniela gimnazjo w Rybniku skończyła. Starzik i po znajomości robota w rachubie załatwiył na grubie. Tam tyż na Siwce zaczon sie kryncić kole nij taki Zbyszek, kery jaki trzi lata tymu na Śląsk ze zimiokami przijechoł z „Bożych stron” i teraz w „bykowni” przi grubie miyszko. Robiył na tym samym oddziale co Szkyrtek i dobrze se go zapamiyntoł i poznoł, co w nim siedzi. Pamiynto, jak po piyrszyj szychcie na dole cołki bakeliciok o zola połodziyroł, zaś arbajtancug pyłym wynglowym uciaproł, żeby sie nazywało, że już stary bergmon z niego, taki cwaniaczek. Niy dość tego, to sie nauczył kajś pora ausdrukow grubskich i wielce Ślonzoka chcioł udować.

Komentarze

Dodaj komentarz