Tak se to Szkyrtek od siebie odganioł, ale i tak nic niy poradziył zrobić. Przeca i tak wiedzioł, że miłość jest gorszo niż sraczka, bo na własnyj skorze to przeszoł. Jego szwiger tyż z początku bronił sie z Reginom spotykać.Zawołoł se roz Emil swoja cera do izby i zaczon i tuplikować:- Wiysz ty, Anielko, co ty chcesz zrobić? Ty mi chcesz do chałpy gorola skludzić? Jeszcze takigo wichlyrza jak tyn Zbyszek?!Wszystki „arbaje”, filcoki, gumioki, rynczniki i diosi wiedzom, co tam jeszcze, tyn pieron za półdarmo od tych młodszych werbusow skupuje pod grubom, a potym na torgach sprzedowo raciborzanom, kerzi tu do nas z gymizom jeżdżom. Na pewno tuplowanie na tym zarobio, bezbożnik jedyn. Za co se ta syrynka kupiył? Gizd zatracony!- Widzisz tato, jakiś ty jest po zadku. Przeca inksi, kerzi śnim przijechali „na zimiokach”, jak ty to godosz, nic se jeszcze niy fondli. Wszystek, co zarobiom, w szynku przepijom. Zbyszek teraz chodzi zaocznie do technikum górniczego i beztoż musi mieć piniondze na książki i inksze rzeczy. Potym chce sie na politechnika do Gliwic dostać, a ty go tak szeredzisz.- Już tam śniego bydzie inżynier, jak z kozij p... rajzyntasza. Gorole dycko za tyn lekciejszy koniec chytajom. Mało to tukej jest naszych szykownych karlusow? Dejmy na to Sztefek od Makslika, zawsze, co mie spotko, to z daleka piyknie pozdrowio i dycko sie pyto: „Jak tam Anielce leci?”. Co mu mom pedzieć - że z gorolym zolycisz? Co?- Tatulku, czy wom tyż starzik Janek dziołcha znejdli? Wy mi tu Sztefka na gwołt ciśniecie. Co jo moga za to, że Zbyszek z tych „Bożych stron” pochodzi.- Bo to robotny synek i niy słepie gorzoły po szynkach jak te werbusy. Makslik mi godoł, że już se sypialka kupiył, jakoś złoto brzoza z wyginanymi dźwiyrkami i zdrzadłym w pojstrzotku.- Niy robcie mi na śmiych, tatulku, taki meble to już downo niy som modne i niy zawsze to, co najdrogsze, musi być piykne.- Ostatni roz ci godom! Skończ z tym gorolym, bo mi chopy żyć na grubie niy dajom, tako gańba mi dziołcho robisz. Jeszcze ludzie z Popiylowa pamiyntajom ta haja na muzyce w szynku u Holony. Dwóch naszych synkow werbusy wtedy zabiyli i poru do szpitala odwiyźli. Do dzisioj tam zabawy som zakozane. Gorole to som zabijoki i niy takigo ziyńcia by my se z mamom życzyli.- Żodyn do dzisioj niy wiy, czy werbusy, czy tyż nasze synki gorsze byli. Sami wiycie, że prowda dycko w pojstrzotku leży. Wy śnim tatulku i tak żyć niy bydziecie. Sami dycko godocie, że jak se pościela, tak sie wyśpia. Jo wom przaja i niy chca wom starości przisporzić, jo łonymu tyż przaja i tak sie za niego wydom.
Komentarze