20031902
20031902


Ta jego Niymka miała jednego synka z piyrszym chopym, ale on już od wojny w Kanadzie miyszko, tam mo swoja rodzina i o Niymcach słyszeć niy chce. Dobrze by było, jakby teraz ktoś z rodziny do niego przijechoł i śnim tam zamiyszkoł. Szkyrtkowi sie zaroz o Anielce wspomniało i w duchu se pomyśloł: „Tyś mi z nieba spod, Konradku, już wola, coby Anielka za jakigo Niymca sie wydała niż za gorola!”.Szkyrtek na głowie stanył, coby gibko Anielce paszport wyrobić, co wcale niy było taki proste, przeca to był siedymdziesiąty drugi rok! Musioł juzaś starzik Anielce tyn paszport wydeptać, bo przeca chody mioł wszyndzie skuli swojij przinależności do ZBoWiD-u.Ujec Konrad przijechoł tyż wtedy piyrszy roz na odwiedziny do mamy, kero dalij miyszkała na starym miejscu w Rybniku. Wszyjscy somsiedzi, kerzi go pamiyntali z tyj bronotnyj koszuli z hakenkrojcym na rynce, przichodziyli teraz do Any oglondać Konrada. Ciekawi tyż byli, czy aby go niy zawrzom teraz. Na szczyńści nic takigo sie niy stało, chocioż pora razy musioł sie na milicyji meldować.Poprziwoziył wtedy Konrad pełny kofer rostolicznych maszkietow w tym swojim mercedesie. Hanys Kowolik już sie niy doczekoł swojigo starszego syna, umrził pod koniec piyńćdziesiątych lot i chocioż mu wtedy telegram posłali, boł sie Konrad wtedy przijechać.Anielka pojechała ze swojim ujcym do Nimiec z ciekawości, bo niy wiedziała, co jeji ojcowie uradziyli. Szkyrtek już braciszkowi pedzioł, co mo tak robić, żeby na dycki tam została. Tak tyż było. Anielce sie tak spodobało w Niymcach, że sama do ambasady pisała o przedłużynie, a potym posłała list du dom, ze wcale niy wraco, bo ujec i tukej wszystko zapisze i robota dobro znojdzie.Tak to Anielka zaszperowała wyjazdy zagraniczne cołkij rodzinie - ani do Czech żodyn wyjechać ni mog. Emila i Regina co chwila na milicyjo wzywali i musioł Szkyrtek wysłuchiwać, że taki zasłużony górnik i wyścigowiec z odznakami, a tak dziecko wychowoł. Łonymu to jednak do jednego ucha wlazło, a drugim wylazło.- Mom ich pełno rzić i grubski spodnioki! - godoł Szkyrtek, jak sie go kery pytoł, co tam chcom po nim na tyj milicyji. Był rod, że teraz bydzie mioł świynty spokoj z tym gorolym Zbyszkiym.Tukej sie jednak przeliczył, niy przipuszczoł, że tyn gorol taki zawziynty na Anielka bydzie. Załatwiył se Zbychu paszport, kery bez wiynkszych ceregeli dostoł. Potym mu jakiś kolejarz pod Raciborzym nimiecko wiza załatwiył i zaczon do tych lepszych Nimiec jeździć. Już przi piyrszym wyjeździe z Anielkom sie spotkoł, przeca cołki czas do siebie pisali i dzwoniyli, ale o tym Szkyrtek niy wiedzioł.

Komentarze

Dodaj komentarz