20014101
20014101


Jak już Wom pisałach ciepli mie do glashauzow ku kwiotkom i flancom. Boło tam tego łokropnie moc – muszkaty, begonie, karłowane gyjorginy, sztudyntki, petunije, fuksyje i kupa inkszych, kierych ani niy poradza zmianować. Od samego rana po te kwiotka przijyżdżały auta-blaszoki z Dortmundu, Recklinghausen, Essen. Jo miała w pakcie wszystkie te zamówione kwiotka policzyć i przirychtować do transportu. Jak już z tym bołach fertik, brałach sie za podlywanie łobu glashauzow. Ta robota z wodom boło bardzo przijymno, zwożywszy, że pod szkłym we słoneczno pogoda człowiek się czuł choćby w piekle. A to skirz duchoty i łokropnego woru, jaki tam panowoł. Dobrze, ze chocioż woda w szlałchu boła zimno i szło się niom dlo ochłody trocha opyrskać. Jak zaczłach podlywać kole dziesiontyj, to kończyłach o szóstyj po połedniu. Tela tego boło !Nojgorzij robiyło sie przi tomatach i łogorkach, bo z tym dwadziestometrowym szlałchym trza boło slalomować miyndzy pionowymi sznurkami, na kierych łogorki z tomatami wisiały. Trza boło pieronym dować pozor, co by ło te sznurki szlałchym niy zahoczyć i cufalym wytargać z korzyniami łogórka, abo tomaty. Musiałach tyż fest szpicować uszy i wysilać mózgownica, kiedy bauer godoł do mie po nimiecku, co i jako mom zrobić. Dobrze, że chocioż trocha nauczyli mie w doma szprechać. Teraz mi sie to pierońsko przidało.Piyrszy dziyń roboty zlecioł mi jakoś roz dwa. Drugigo dnia łod poczontku szychty ladowałach flance do kistów. Kole połednia zaczło sie dzioć cosik dziwokigo. Zaglondom, a nałokoło glashałzu tyrajom jakieś glacoki , na czorno łobleczone i z krótkofalowkami w pazurach. Boło ich możno osiym ; siedym chopów i jedna baba. Baba rzecz jasno nie miała glacy, za to wyglondała choćby King Kong. Zaczłach sie boć. Zresztom niy yno jo. Po szklarni lotali tyż wystraszyni jak zeltry Słowyńce, Chorwaty i Turki. Jak sie zachowujom Poloki z Pomorza, niy widziałach, bo sztychali w polu szpargiel szykowny konsek łod bauerstwa. Zdążyłach sie jednak dowiedzieć, że te groźnie wyglondające ludzie, to szupoki z arbeitsamtu. Przijechali zrobić kontrola i wychytać tych, kierzi robiom na czorno – czyli niylegalnie. Jo niy miałach sie czego boć, bo przeca u mie w papiorach boło wszystko jak trza. Ale bołach sie tak czy tak. Nogi miałach jak z waty, na gymbie pobladłach, a po plecach tyrały mi mrowce-straszki.Zagoniyli nos na plac i kozali wyciągnąć paszporty i umowy o robota. Jo ich przi sobie niy miała. Łostawiałach te ważne papiory w izbie u bauera. Toż chca po nie lecieć i wyrywom sie w strona chałpy, a ta baba King Kong..... łap mie za szkrabikel i ciagnie nazot ku wszystkim. Potyrpowała mie przi tym jak policjant rabczyka. Wkurzyłach sie festelnie, bo tyż jakim prawym diosecki babsztyl tak szpetnie mie traktowoł. Przeca nic złego żech im niy zrobiłach ?! No, ale czekałach co bydzie dalij. Mój paszport i umowa musiała prziniyść z chałpy bauerka, i jak wszystko już połoglondali ze wszystkich stron, coś tam jeszcze popisali - mogłach iśc dalij do swoji roboty w glashałzie.Słowka „przepraszam” za niygrzeczne traktowanie niy doczkałach sie. Dowiedziałach sie za to od inkszych Poloków, że to je piyrszo tako kontrola, jak dugo w robiom. A robiom już osiym lot. Zaroz żech se tyż pomyślałach, że to widać jo mom takie popsznione „szczyńście”. Ledwiech zaczła robić – już mie kontrolujom. I powiym wom jeszcze, że niy boła to łostatnio kontrola, jako musiałach w Niymcach przeżyć. Ale o tym połosprawiom już nastympnym razym.

Komentarze

Dodaj komentarz