Jak żech była mało, to ludzie sie wiyncy dziwali na niebo jako dzisio! Godało sie, że jak po zachodzie słonka niebo było czerwione, to na drugi dziyń przidom wiatry. Wybrane niebo we nocy bez lato zwiastowało wielgi chyc, a bez zima siarczysty mroz.
Jak czerwione niebo pokozało sie poźno na podzim, to dzieckom bojali, że świynty Mikołoj pierniki we piecu piecze, chocioż moje kamratki, co były ze drugigo końca Polski, dycki sie z tyj godki śmioły, bo łone wiedziały lepij, że to Baba Jaga te pierniki rychtuje, a wszystek po to, coby zwobiać niyposłuszne dziecka do lasa.
Jak zagrzmiało, to mój tatulek tuplikowoł, że w niebie beczki ze piwym kulajom! Jo mu niy wierziła, bo żech wiedziała, że robi nos za błozna, ale mój bracik, co był młodszy łody mie ło dwa lata, doł sie na to chycić!
Padoł mi kejś tak:
– Pamiyntosz siostrziczko, jak nasz tata kupił chopom, co gronta pod nasza chałpa ciepali aż po dwie flaszki piwa, coby sie mogli łochłodzić, bo był wielgi chyc?! Jo se myśla, że we tym piekle tyż je tak gorko i te diobołki tako beczka piwa za jedyn dziyń wypijom, co padosz? Musiałach synkowi pedzieć, że gupoty łozprowio, alech go niy przeświodczyła, bo to było już we tych czasach, kiej łon zmiarkowoł, że jego starszo siostra ni ma wiela mondrzyjszo łod niego!
Za to nasz ujek Józik to nom dycki nagodoł, że jak je burza, to we niebie aniołki ze rogatymi we fuzbal grajom. Kiej moj bracik chcioł wiedzieć, kerzi wygrywajom, to godoł ze zbolałom machom (a w duchu sie śmioł!), że sprawiedliwości ni ma, bo świynty Pieter syndziuje, a wszyjscy strzylajom gole yny do jednej bramki – tyj, co wiedzie do nieba, i my gupieloki długo jeszcze w to wierzili!
Abo pamiyntocie tako godka: dyszcz pado, słońce świyci, marcha masło klyci! Jak tako pogoda uwidziała nasza somsiadka Kowoliczka, to zaroz gnała krowa z pola do dom, coby i jako marcha mlyka niy zebrała! Dycki wołała jeszcze na nasza mamulka, aby nos gibko brała do chałpy, bo bezmała łod lotanio po dworze przi taki pogodzie strasznego bolynio gowy szło dostać!
Starsi porzad dzieckom jaki nudle na nos wiyszali, ale dzisio bajtle już niy som taki gupie, bo do szkoły chodzom!
Komentarze