Moja starka łogromnie niyrada słuchała, jak kery godoł na drugigo, że tyn istny je stary, bo podle ni, we takij godce brakowało szaconku do biołych starzikowych włosów a do uzbiyranej bez cołki żywot mondrości!
– Staro to je krowa, a człowiek to je nojwyżyj leciwy! – tak dycki kończyła taki godani.
Teroz to by sie zaroz kery burził, jak by mu padali, że je leciwy, bo sie już mało tego słowa używo, a dzisio znaczy to tela, że tyn człowiek je fest stary!
Piyrwej ludzie wierzili, że nojdłużyj ze wszystkich stworow na świecie żyjom wrony i jak kery setka przekroczył to godali, że zeżył tela co łone!
Za bajtla słyszałach tako bojka, że jak Ponboczek wypuszczoł na świat swoji stworzynia, kożdymu przipisoł lata, kere tyn istny stwor mioł na ziymi zeżyć. Myjszym doł myni, wiynkszym wiyncy! Mysz dostała jedyn rok, kokot – trzi lata, świnia – piyńć, krowa – dziesiyńć, łoroz spomniało sie mu ło Adamie a Jewie.
– Dziesiyńć lot wom styknie? – spytoł sie.
– Wiyncy! – za łobuch łodpedziała Jewa.
Potym prziszła na raja koza, po ni był łosioł, koń a elefant, co dostoł szterdziyści lot, ale Jewa porzad chciała wiyncy a wiyncy!
– Jewa, rozmyś se to, co godosz – padoł Ponboczek - bo teroz byda dokłodoł lot, ale broł krosa!
Musiało mu sie użalić, bo Jewa dość gryfno była, ale łona dalij godała swoji, bo tak fest była na tyn nowy żywot pragliwo! Adam zaś nic niy godoł, yno zdoł sie ze wszystkim na Pana Boga, bo fest wierził w jego mondrość!
Ponboczkowo robota miała się już ku końcowi, kej ze lasa przileciała czorno wrona, co sie świyciła we słoneczku jak linek!
– Jeszcze jo, jeszcze jo, Ponboczku! – zakrakała z wiyrchowiska.
– Kajś tak łobzajtowała stworo jedna, teroz mi już yno sto lot łostało, a za to ci cołko krosa musza zebrać, już sie tak świycić niy bydziesz!
Wrona pokornie schyliła gowa a wziena, co Pon Bog doł: dostała trocha pukla a cołki plecy zrobiły sie i siwe!
– A jo a Adam? – spytała sie Jewa, ale Ponboczek już mioł prożny koszyk ze latami.
– Ło was żech przepomnioł, ale dom wom tela, wiela wronie, yno za to plecy sie wom troszka prziklupiom a gowa zesiwnie!
I tak ludziska żyjom nojdłużyj ze wszystkich stworow na świecie!
Komentarze