Mom dalszego przociela Karlika, co je rodym ze Rudy Ślonski. Pod koniec szterdziestych lot był już na tela wielgi, że łojce mu dowali paść krowa. Śnim dycki na poszo przileciało dwóch modszych bracików, bezto mamulka dowała im na droga trzi krajiczki chleba a flaszka ze wodom. Przeważnie jak prziszli ku hołdzie, kaj ta krowa paśli, to chlyb zjedli, a woda łostawili na potym, jak by sie im pić chciało, ale jedyn roz było fest gorko, bezto wypili woda a chlyb łostawili z miyszkiym na miedzy i tyn chlyb sie stracił, yno miyszek łostoł! Było to dzieckom dziwne, bo na blisku niy było żodnego, coby se go mog wziońć, ale w doma nic niy padali, bo sie boli, że dostanom po dupie. Bez latowe feryje chlyb sie jeszcze stracił ze dwa-trzi razy.
Skończyło sie lato a prziszoł podzim, ale Karlik dali posoł krowa wele hołdy kożdy dziyń po szkole. Braciki teroz małokedy śnim przichodzili, bo we wieczor było już zima. Za to broł ze sobom dwoch kamratow: Bolesia a Zefka. Coby sie łogrzoć, synki zrobili fojera a piykli w ni kartofle, co kajś na polu wykopali. Łoroz przistanoł wele nich jakiś niywielki chop, prawie sagi, cołki czorny na ciele a tak fest zarośniynty, że ani gymby mu wiela niy było widać! Nic niy godoł, yno wyciongnoł rynka, jakby cosikej chcioł. Normalnie, to by sie dziecka wylynkali a zaczyni wrzeszczeć, ale wtynczos łod tego stwora szło taki ciepło, jakby coś dobrego! Karlik stanoł ze ziymie, wygrzeboł kijym jedyn zimiok ze fojery a pomaluśku przekuloł go pod nogi przibytnego. Jeszcze niy zdonżył padać, że je gorki, jak tyn chopek chycił go do rynkow, łośmioł sie a polecioł prosto ku hołdzie i kajś sie stracił we krzach. Dziepiyro teroz synkow strach łoblecioł, ale za kwila przeżegnali sie a po lekuśku jedyn za drugim poszli ku hołdy. Troszka to trwało, niż miyndzy krzokami znodli jakoś wykopano dziura, co wiodła do ziymie. Musiała być strasznie głymboko, bo jak Karlik pora razy ciepnoł do ni kamiyniym, to niy było słyszeć, coby kamiyń spodł na dno.
Na drugi dziyń Karlik prziszoł ze tatulkiym, ale dziury niy poradzili znojść. Bezto sie synkom dostało za to, że robiom starszych ludzi za błozna.
Komentarze