Hamster to je dziwoki źwiyrz, troszka wynkszy łod mysze, a do swoji dziury snosi wszystek, co kaj spotko! Bezto na zima mo połno śpiżarka, chocioż czasym sie tyż tam trefi rzecz, co mu sie niy przido, choćby konsek plastiku!
Som tyż ludzie, co radzi hamstrujom, kaj co taki uwidzi, zaroz to popadnie a do chałpy skludzi. Nikerzi zbiyrajom yno śmieci a potym gospodarka komunalno mo z tym umsztynda, bo wszystek trza wywiyźć nazod na wysypisko, ale som tyż szpece, co dycki hamstrowali a hamstrujom jeszcze porzad, yno robiom to ze gowom!
We starczynej wsi była tako jedna baba, co niy ominyła ani jednego weselo, krzcinow ani pogrzebu. Wszyndy sie ryła, chocioż jom niy pytali, bo godała, że je biydno, bezto bogatsi by jom mieli spomoc, ale że sie niy kwapili, to łona sama musiała sie za to wziońć!
Za jakiś czos już i niy stykło, że pojadła a popiła, yno łod tej pragliwości kombinowała nad tym, jak to zrobić, coby se jeszcze co do dom przismyczyć! Uszyła se taki miyszek, co go szło powiesić na kark a skować pod łachami, a szyroki chopski kecury przikryły wszystek. Kaj co uwidziała frajnego, to popadła i do miecha wcisła, a potym miała co jeść bez cołki tydziyń! Łogromnie jednako żałowała, że se tam ni mogła gorzołeczki naloć. Cołko flaszka
ze szpontym to by tam jakoś wcisła, ale chopy jom do cołkigo połka niy dopuszczali, co nojwyżyj pololi po keluszku! Kożdego tyż wypić ni mogła, bo jakby sie naprała, to by sie mogła ze tym hamstrowanim wyzdradzić!
Jak na podzim było weseli łod łorganistowej Andzie, to zaroz ze wieczora tela do miecha nacisła, że zamiarowała po cichuśku sie wytracić, coby se trocha we chałpie ulżyć, a potym do kaczmy prziść nazod, a jeszcze co pohamstrować!
Łod tej pragliwości niy dała se pozor, że jom łobserwuje weselny starosta. Waluś to był taki chop, co przeszoł świat a pyjter karty i jak se co pomyśloł, to tak zrobił. Jak baba zaczła brać się ku dźwiyrzom, to łon za niom, a pytoł jom ło taniec, a starostowi niy szło łodkozać! Waluś fest wywijoł ze starkom a tak jom wytrzons, ze tasza sie i urwała a jodło wysuło nazol!. Baba strzeliła do dźwierzy a wiyncy sie we kaczmie niy pokozała!
Komentarze