Listopadowe wrożby

We listopadzie kończyły sie roboty na polu, bezto modzi mieli trocha czasu na graczki. Przed samym Adwyntym przipadały dwa świynta: Katarziny a Andrzeja. We Katarzina wrożyli se synczyska, ale co tam wyprawiali, żodno dziołcha niy śmiała wiedzieć!
Za to dziołchy świyntowały na Andrzeja i synkow tyż na zabawa niy puszczały, ale co tam robiły, wiym łod starki Elzy!
Jeszcze przed cimokiym wystrojone dziołchy wystowały przed siyniami, zwoływały kamratki, a potym całom hormijom szły do tej, co sie u ni na wrożeni ugodały. Tam miały przirychtowany kołocz a tyj ze malwy. Troszka pojadły a popiły, a potym zaczły sie harce! Dziołchy tańcowały a śpiywały, a jak na kościele pizło dziesiyńć, to sie wzieny za te leksze wrożby, co ich szło robić ze kamratkami. Loły wosk, chocioż farorz fest pomstowali na to ze ambony, a potym se wywrożyły z tego ulotego, jakigo dostanom chopa. Jak jednej dziołsze wyszoł dziod ze brodom a długim nosym, to i zaroz nojlepsze kamratki padały, że se jom weźnie stary, bogaty aptykorz ze Rybnika! Frelka sie rozbeczała a łodpedziała, że niy chce starego, bogatego dziada, yno modego gryfczoka, choćby i biydnego, a ciepła woskiym we kont! Musiała to pedzieć we zło godzina, bo za pora lot sie i te życzyni spełniło. Prziszoł po nia mody a gryfny syn łod młynorza, ale to był taki utrata: wszystek majontek, jaki łoba ze chałpy dostali, przepił, a potym, jak niy było co do garca wrazić, to jeszcze proł babeczka a dziecka a we jejich chałpie nigdy spokoju niy było!
Kole połnocy już dziołchy pojedynczo chodziły wionzać sztachety we płocie szlajfkom, co jom coluśki dziyń we włosach nosiły, abo szły do somsiada na szczypy, co były przirychtowane do polynio, a nazbiyrały ich tela, wiela uniosły, ale trza ich było dobrze skryć, coby żodyn ich niy podebroł. Jak rano zawionzane sztachety były do pory, abo dziołcha ze szczypow uskłodała cołki kulok, mogła sie radować na wydoj, a jak niy – to musiała jeszcze rok poczkać!
Tych wrożbow było tela, że sam je za mało miejsca, coby ich wszyski łopisać, a możnej ło nikerych ani niy wiym, bezto spytejcie sie swojich starkow abo mamulkow, co tam jeszcze za modu pochały!

Komentarze

Dodaj komentarz