Na grubie trza dać pozor!

Na te wszystki stare gruby a huty, co na nich godomy „dziedzictwo przemysłowe”, tyż poszło troszka piniyndzy ze Unie. Bezto budynki momy pomalowane, a kaj sie dało, tam zrobili muzeum, abo na zawartych grubach, jaki wyższe szkoły majom siedziby.
Ale gruba je piykno yno ze wiyrchu, na dole je czorno a kupa kurzu ze wonglowego pyłu, bezto nasze grubiorze jak wyjadom na wiyrch, wyglondajom jak Afrykańczyki: yno im sie zymby a łoczy świycom! Ale na nikerych grubach je bioło! Tam napylajom kamiyń, coby sie tyn pył z wonglo niy chycił. Ujek Stanik mi dycki to godoł za bajtla, ale jo se myślała, że łon se sy mie szpasy robi. I dziepiyro jak żech chodziła do liceum, roz my na grubie byli cołkom klasom a uwidziałach to na swoji łoczy!
Robota na grubie je ciynżko! Tego bergmonom godać niy musza, ale pisza to do tych ludzi, co nigdy na dole niy byli. Przi kożdej robocie trza se dać pozor, a tam pod ziymiom tyn pozor musi być nadzwyczajny! Wiela mi ło tym rozprowioł Sztefan, przociel łod mojigo chopa, co robił na jastrzymbskich grubach aż do pynzyje.
– Tam dziołcha ni ma miejsca na szpasy a klachani – padoł – bo jak niy dosz pozor, to możesz kerego zabić abo go uszkodzić! Jo robił we roztomańtych miejscach, a cosikej ło tym wiym, już trzi razy mie smiertka po plecach grabała, ale jo sie i niy doł! To, co żech przeżył, to mi jeszcze niyroz stowo przed łoczami a mrowce mi po krziżu wtynczos lotajom! Jedyn roz mie mało niy przicisła obudowa chodnika, bo tego chopa, co siedzioł na maszynie, zagodoł nasz elektrykorz. Jak mie na wiyrch do laboru wywioźli, to aże dwie szwestery ze moijich plecow konszczyczki wonglo wyciongały pincetami, a skora żech mioł cołkiym spolono łod płynu do dezynfekcyje! Po drugi: to jo zostoł po szychcie troszka po zadku, łoroz widza – chodnik zacisko! To jo w nogi i ku drugimu chodnikowi, a za poł godziny wyjechoł żech na wiyrch, kaj czekali wylynkani kamraci! A trzeci roz, już żech ta bioło mioł przed łoczami, bo niywiela brakowało, coby mie wozki rozcisły, ale mie świynto Barborka zratowała, bo to niy był jeszcze moj czas! Ale prowda je tako, że na dole trza se dać rychtik nadzwyczajny pozor!

Komentarze

Dodaj komentarz