Na Nowy Rok ludziska se dycki życzom wszyskigo dobrego, a potym ło tym zapominajom abo liczom, że sie te życzyni samo spełni!
Kupa lot nazod, jak moja cera szła do Piyrszej Komuniji, uczył jom taki fajny starszy ksiondz i łon padoł dzieckom tak:
– Jak ci gdo co życzy, to ty potym musisz tak robić, coby sie te życzyni spełniło! Dejmy na to starka ci życzyła, cobyś sie dobrze uczył, to ty musisz sie wziońć za nauka, bo inakszy sie starczyne życzynie niy spełni...
Doł jeszcze dzieckom pora takich przikładów i jak żech go tak suchała, toch prziszła na to, że łon mo prawie! Samach sie tyż trocha nauczyła, bo przodzi, by mi to ani do gowy niy prziszło!
Nasza ciotka Zuzka, co dziewiyndziesiont lot zeżyła, we kożdy nowy rok se postanowiała, że troszka schudnie, bo wożyła bez sto dwaścia kilo a fest norzykała, że sie skuli tego niy poradzi piyknie oblyc! Godała, że na nia pasujom yno namioty, co majom dugi masty, bo ciotka była fest wielgo, kole metra łoziymdziesiont! Jednako cołki lata ze tego ciotczynego postanowiynio nic niy wychodziło, bo łona miała dycki tela roboty, że rychło ło nim zapominała!
Jak jeji synek sie wyksztołcił na doktora medycyny, padoł, że mamulki prziwachuje, bo sie boł, że i serce wysiednie!
To były te czasy, co ło dyjecie mało kery słyszoł, bezto Francik musioł se zadać kupa proce, a som jom napisać na papiorze. Jak była już gotowo, to poła ze tych rzeczy, co tam figurowały, ciotce sie niy widziało!
– Synku, jo po gorolsku warzić niy byda! Sam mo być wszystek ślonski i to, co mi smakuje! – godała, a doktorek broł papior nazod a zaczynoł łod nowa.
I tak było jeszcze pora razy! Jednako na swoji urodziny, co przipadajom we lipniu, ciotka już niy poradziła sie wymigać a kartka przijyma. Yno że tyj dieta niy zaczyna zaroz. Padała, że to se trza brać po leku i łona tyż zacznie łod pyndziałku, ale żodnymu niy padała łod kerego!
Ciotka cołkiym inakszy pojmowała dyjeta niż Francik. Do końca żywota miyndzy łobiadym a wieczerzom niy jadła nic, coby i niy smakowało!
Moji Roztomili Czytelnicy, na tyn Nowy Rok 2013 życza, coby sie Wom we żywocie dobrze wiodło, ale pamiyntejcie, że tego bez procy ni ma!
Komentarze