Nasze starki a starziki

Gdo nos piastowoł, jak my jeszcze we pieluchach leżeli, wszyndy nos ze sobom broł i gdo nom nojwiyncy, krom mamy a taty, przoł? No przeca nasze starki a nasze starziki!
Jo tamte czasy, jak żech była bajtlym, łogromnie ciepło wspominom. Miałach starka Elza (mamulka łod mamy), co snami miyszkała i oma – mamulka łod tatulka. Na kożdo godałach inakszy, bezto mi sie nigdy nie myliły! Starzika miałach yno jednego – tatulkowego faterka, bo tyn drugi umrził dziesiyńć lot przed mojim narodzynim, zdrowio ni mioł i wiela niy pożył.
Nasz drugi starzik ani swojich dziecek, ani wnukow nigdy niy piastowoł, tako robota babom łostawioł. Łon woloł iść do lasa, tako mioł służba!
Choć byłach dziołcha, to jak żech trocha podrosła, to mie czasym ze sobom do lasa wzion!
Po drodze mało godoł, ale kupa rzeczy mi pokozoł: jak wyglondo lis, kaj borsuk mo dziura, czym sie rożni zajonc łod dzikigo krolika, jak poznać, że we tym miejscu mogom być sowy... a wiela jeszcze inszych rzeczy, co mi sie potym niyroz na feryjach przidały. Nasz starzik poźno sie żynił, ale długo żył, umrził, jak mi było bez dwaścia lot, bezto do dzisio sie raduja, żech go tak dugo miała!
Ze omom tyż my sie chnet dogodały, chocioż żech sie śniom myni widziała jak ze naszom starkom, ale łobie my sie rade strojiły! Oma miała we szranku roztomańte oblycze ze swojich modych czasow: dwa piykne balklajdy, co na mie do ziymie siongały a kupa hutlikow, coch se mogła przimierzić! Teroz to sie niyroz dziwuja, jak taki łachy przetrwały bez wojna, kej wiela inszych ważnych rzeczy, co sie wtynczos straciły, nigdy już niy prziszło nazod?
Jak byłach trocha starszo, to ze omom szło pogodać na „babski tymaty”!
No a moja starka była sy mnom dycki, co pamiyntom, piastowała mie, przeblykała, jeś dowała, jak mamulka miała jako pilno robota, ale po dupie tyż mi łotrzaskała, jak żech jom znerwowała. Rozprowiała mi bojki, te same, co wom czasym bojom i sztyjc żałuja, żech jom miała yno tak krotko, bo umrziła, jak chodziłach jeszcze do podstawowej szkoły.
Dziepiyro jak nom samym gowa zesiwnie i doczkomy sie wnukow, docyniomy to, wiela starziki a starki do swojich wnukow zrobili!

Komentarze

Dodaj komentarz