Chłop namówiony, a groch niy solony jednako smakujom! – Tak starka Kuliczka dycki warowała mode frelki, co sie rwały do wydaju, a niy patrzały na to, jakigo chopa se bierom. Ta baba wiedziała, co godo, bo sie aż trzi razy wydowała!
Piyrszego chopa miała namówionego, miyszkoł po somsiedzku, łojce sie ugodali a modych pożynili. Tyn Hanys niy chcioł se brać somsiadowej cery, bo przoł inszej, ale musioł posłuchać łojcow! Niy było wiela szczyńścio we tym małżyństwie: Hanys sztyjc na swoja baba wyrczoł, miyszek ze piniondzami trzimoł, krupy do garca rachowoł, niy dowoł na łoblycze babie ani dzieckom! Co boroka Kuliczka za modu wystoła, yno Ponboczek wiedzioł, bo podle swojigo chopeczka to łona była dycki wszyskimu winna i tymu tyż, że sie jego staro libsta źle wydała i ślubny jom proł... Dugo jednako społu niy żyli, bo Hanys we piyrszej wojnie kajś we Francyji pod!
Baba czekala na niego jeszcze dugich piyńć lot po wojnie, ale łon niy prziszoł nazod, to se wziyna panoczka rechtora. Myśloł by se kery, że Kuliczka chyciła Ponboczka za nogi, ale panu rechtorowi było gańba, że mo tako prosto baba, na dodatek jeszcze ze dwoma dzieckami. Bezto wszyskim godoł, że sie łożynił ze rozsondku, bo jak mu mamulka umrziła, to mu ni mioł gdo prać a warzić! Nikaj ze swojom babom niy szoł, ani nawet do kościoła. We chałpie Kuliczka musiała mu dać jedna łosobno izba, ale ani łona, ani dziecka tam niy śmieli wlyźć bez pozwolynio! Głodym, co prowda, niy przimiyrali, ale panoczek sie do gospodarki niy dokłodoł, ani na ni nic niy robił! Tyn wydoj mioł tyż swoji dobre strony: Kuliczka była we wsi poważano, bo była rechtorowo. Dugo jednako ze tym swojim drugim chopeczkiym niy pożyła, bo był słabego zdrowio. Jak umrził, to sie łokozało, ze wszyski swoje piniondze zapisoł siostrze ze Niymiec, chocioż to jego baba go we chorobie łobchodziła!
Trzeci chop łod Kuliczki to był taki mały, puklaty Hajnuś Kulik, co i fest przoł. Jo jeszcze pamiyntom, jak niyroz łod moji starki wykusił jaki kwiotki ze zegrodki do swoji babeczki, a jak skerym godoł, to sie i nakwolić ni mog, jako je gospodarno!
Za dugi czekani miała baba noreście dobre śniodani!
Komentarze