Taki dziyń to mogli wymyśleć yno ludzie, co kotom przajom. Niy powiym, jo tyż mom kociska rada, a momy ich aż dwa, jedna gryfno kocio dziołszka Psota, co i je już bez dziesiyńć lot, i trocha modszego kocurka, co mo na miano Bursztyn. Ło nim żech wom już pora razy napisała.
A ze naszom Psotkom to było tak: jednego roku nasza koczka Goldi wykociła sie wczas na wiosna, a potym jeszcze poźno na jesiyń i miała yno jedna maluśko koczka, ale i niy dowała pić a wyglondało na to, że te borajstwo padnie. Cołki dziyń siedziało na boku taki słabe a najyżone. Te starsze braciszki a siostrzyczki, co ich jeszcze w doma było trzi, sie same ło ta maluśko starały, grzoły jom a dopuszczały do jodła, ale łona wiela tam niy skorzystała, bo była za maluśko, a kożdy dziyń było śniom gorzi. Nasze dziecka spuściły lamynt, bo żol im było kotka. Pani weterynarka wiela nom niy umiała pomoc, ale dała im trocha nadzieje, że kotek bydzie mioł szanse przeżyć, jak sie nim dobrze zajmnom. Jednako cołko robota spadła na mie! Wziynach koczka ze pywnice, wsadziłach do akwarium po szilkryjcie a postawiłach na stołku we łaziynce. Mój chop wyrychtowoł tako lampa, coby szło koczka grzoć. Pora razy na dziyń dowałach i pić ze szmatki zamoczonej we mlyku, a potym prziuczyłach jom jeść ze miseczki.
Zatym miana my i żodnego niy dowali, bo niy było iste, eli rychtik przeżyje, ale jednego dnia sama se miano wybrała. To było tak po osmej rano, usłyszałach ze łaziynki łogromny koci lamynt i poleciałach sie podziwać, co sie dzieje. Ta nasza kociczka musiała wyskoczyć ze akwarium, bo pływała we muszli. Widać dziecka sie śpiychali do szkoły i zapomnieli spuścić klapa! Gibko sie łokozało, że to je łogromnie psotne stworzyni, bezto godomy na nia Psotka. Na bezrok zaczła wychodzić na dwor i tak je do dzisio, ale kożdy wieczor sie melduje w doma. Porzad wyglondo jak mody kot, bo do swoji normalnej wielkości niy dorosła, bezto kupa ludzi se myśli, że momy mode. Skuli tego, że nasz kocur je wielgi, dycki borok „robi” za muter łod Psoty, a by mogło być prawie na łopy, bo kocur je modszy!
Jo im gizdom łobom przaja, a łony ło tym wiedzom! Zwiyrz tyż umi pokozać dobre serce.
Komentarze