Hańdowni było wiela roztomańtych fachow, co już dzisio ło nich małokery wiy abo wcale sie niy słyszy! Żodyn teroz tyj eli onej rzeczy niy robi, bo niy potrza, gownie skuli tego, ze teroz momy kupa rzeczy fabrycznych, a inszych już ani w doma niy rychtujymy, bo idzie ich kupić we sklepie za małe piniondze. Zaroz dom wom pora przikładow:
U nos we pywnicy stoji dymbowo beczka, co jom bednorz Gładysz zrobił jeszcze przed drugom wojnom. Starka dycki w ni kisiła kapusta na zima, potym jom dostali moji łojcowie.
I dali w ni bez zima była kapusta abo łogorki, a bez lato – woda do gowiedzi, coby sie niy rozeschła, ale teroz już delszy czos je prożno, aż końcu sie rozleci, bo jo ta kiteczka kapusty a łogorkow, co mom ze zegrodki, ukisza se we krałzach.
Pamiyntom, że jak jo była małym bajtlym, to łojcowie trzimali kroliki. Jak kerego zabili, to jo leciala na Kościołek do taki paniczki, co kupowała surowe skorki. Wiela, żech tam niy dostala, ale było na hefty do szkoły abo mi mamulka dołożyła do nowych strzewikow.
Po wsiach jeździli wtynczos szmaciorze, co za stare hadry dowali nici, jegły abo emaliowane gorki, a dzisio po skorkorzach abo szmaciorzach ni ma ani słychu ani dychu...
We zapomniyni poszli tyż drociorze, co poradzili potrzaskany bonclok tak podrotować, że śniego ani kapka wody niy wyciykła. Kamionkowych garcow sie już dzisio niy używo! Delszy czos przetrwali jeszcze szlajfiyrze, co łostrzyli noże a nożyczki. Nytowali tyż blaszane gorki. Tych to jo jeszcze pamiyntom: wloz taki na plac a wołoł: Szlajfiyrz, szlajfiyrz, ostrza, nytuja, tanio...
Ni ma już tyż stelmachow, co koła do forow a bryczek robili. Jo yno jedyn roz widziała wiela było ze tym graczki, a tyn istny, co my ze tatulkiym u niego byli, mioł już tako maszyna na deptani a niy strugoł wszystkigo we rynkach, jako downi! Potym prziszła era baloniokow, a małokery na rafiokach jeździł. Starzik umarł a żodnymu fachu niy przekozoł... a teroz to już ani wiela forow ni ma, a stare bryczki stojom we muzejum. Koniow tyż je coroz myni...
Świat sie fest zmiynio: bez piyndziesiont lot nazod we Żorach było trzech kowoli, teroz ni ma żodnego!
Komentarze