Jak Ponboczek stworzoł we raju ptoki, to se zaplanowoł, że kożdy bydzie inszej farby. Nikere bardzi pragliwe ptoki taki jak papagaj abo pow, to pora farbow naroz zebrały, ale tego ptactwa było tela, że w końcu Ponboczkowi te wynokwiani na łokoło sie zmierzło i zrobił trocha cołkiym czornych a bronotnych, niywiela biołych i dość pora siwych.
Łod stworzynio świata ptoszek rudzik był mały, niypozorliwy, siwy ze bronotnom farbom na skrzidełkach a głos mioł taki, jakby kery tar zielazo ło kamiyń, bezto raczyj niy śpiywoł. Jego somsiod, słowik, tyż był siwy a niypozorliwy, ale za to śpiywoł przepiyknie! Wszystki insze ptoszki, te barwne abo te dobre śpiywoki miały dycki rudzika we pogardzie, bezto miyszkoł we nojgorszych krzokach na kraju lasa.
Jak Ponjezusa takigo zbitego a sponiywiyranego wiodli na śmierć, rudzikowi było go łogromnie żol, bezto lecioł za nim bez cołko droga aż na ta Golgota. Jak boroka Ponjezusa powiesili na krziżu, rudzik doł pozor, że łon fest ciyrpi! Te bodzioki ze ciyrniowej korony, co były pora cyntow dugie wbijały mu sie do gowy, a nojwiyncy go ukrziwdzoł taki jedyn na spaniu!
Ptoszek siod Panujezusowi na gowa a szkubnył dzióbkiym tyn dociyrny bodziok, ale śnim niy było tak łaps! Nojprzod sie tyn ciyrń połomoł i jeszcze wiyncy bolu Ponboczkowi narobił, jednako za kwila doł sie po konsku wyciongnońć. Ptoszek niy zważoł na to, że se piyrze wele dzióbka a pod karkiym cołki łokwawił a radowoł sie, że Ponjezusowi mog chocioż troszka ulżyć we tyj strasznej mynce!
Chocioż Ponjezus był tak fest umynczony, docynił rudzikowe dobre serce a spytoł sie go, coby ptoszek za ta pomoc chcioł, ale łon niy chcioł nic, yny sie jeszcze dopytowoł jakby mog ulżyć Boski Łosobie?
Za to go Ponboczek wynagrodził a doł mu taki piykny głos, że ludzie, jak go słyszom, to sie dycki zastanowiajom, kery to je ptok, co tak piyknie śpiywo, bo wstydlawego rudzika miyndzy krzokami niy widać, yno słychać!
Na pamiontka jego wielgigo czynu dobrymu ptoszkowi łostała jeszcze ta piykno czerwiono farba wele dziobka a pod karkiym. Dycki po tym możecie go poznać, jak sie we waszej zegrodce na wiosna pokoże!
Komentarze