Tam to małokery rod chodzi, no bo jak tu przoć ludziom, co nom bol robiom? Ale co robić, jak nas taki bolyni zymba chyci, że ani spać we nocy, ani jeść za dnia niy idzie? Wtynczos jedyna nadzieja we „złotych ronczkach” łod paniczki dyntystki abo panoczka dyntysty!
Nasz somsiod, co lata z moim chopym kamraci, tyż niy rod ku nim chodził, bo godoł, że ni mo rod ludzi, co sie na ludzkim ciyrpiyniu piniyndzy dorobili, ale jak go przicisło, to we Godni Świynta we pojstrzodku nocy prziszoł łobudzić mojigo ślubnego, coby śnim jechoł do Chorzowa, tyn bolawy zomb wytargać, a tam sie łokozało, że mu rośnie „zomb mondrości”, bezto go tak fest gymba targo! Dostoł antybiotyki, a mioł sie pokozać za trzi dni i przedstowcie se, jak tyn chop za tyn czos zmondrzoł! Ni mog przeżałować, że musioł wydać tela piniyndzy na tego „siarońskigo zymbocza”, a we gowa sie klupoł, że do dyntysty niy chodził, jak go mioł na kasa! Ale teroz zaś nejści niy chodzi, bo na kasa słabe blomby dowajom! Taki to dycki znojdzie jaki wytłumaczyni!
Moja kamratka, co już cołki lata robi za pomoc u jednego znajomego dyntysty, czynsto nom co wesołego ze roboty prziniesie, ale zdorzajom sie tyż taki historyje, co w nich ni ma nic do śmiychu!
Jedyn roz prziszoł ku nim mody doktor ze swojim małym synkiym. Syneczek był wylynkany a porzad sie łojca pytoł, eli te borowani we zombku bydzie boleć? Kamratka chciała dzieciontko uholkać, ale jego tatulek sie i wrył do godki a padoł, że to musi boleć! Po co bajtla tak straszyć! Maluśki sie rozpłakoł, a gymby już wiyncy niy łotworził! Jednako za pora dni prziszoł nazod, tym razym ze mamulkom, a wszystek sie dobrze skończyło!
Troszka strachu szwestera ze doktorym przeżyli, jak do gabinetu we wieczor wloz łostatni pacjynt – taki wielgi mody chop ze spuchniyntom gymbom a chcioł, coby mu co dali na bolyni zymba! Dyntysta padoł, że musi nojprzod tym zomb łobejrzeć, ale młodziok ani niy chcioł ło tym słyszeć:
– Nic stego starzik, bo wy mi tyn zomb wytargocie abo docie jako szpryca, że sie ruszać niy byda mog! – wrzasknoł i łodskoczył do zadku a liznoł przi tym jak dugi, prosto pod nogi policjantow, co go szukali za bijatyka!
Komentarze