Szczwortego maja przipado świyntego Floryjana. To ło nim godajom: patron łod łognia! Isto spominocie se figurki tego świyntego, co ich dycki nojwiyncy po miastach stoło: na bramie, na kościele a na bogatszych chałpach. Floryjan łobleczony był jak rzimski wojok, a we rynce trzimoł zbonek, co nim polywoł łogyń pod swojimi nogami. Bezto na patrona se go łobrali ci wszyjscy, co majom do czyniynio ze łogniym przi robocie: nojprzod fojermany (teroz godo sie strażaki), potym kowole, co ich je już coroz myni, hutniki (jak mój tatulek)
a gryfne synki we sztajfhutach czyli kominiorze!
A teroz troszka na wesoło! Przociele łod mojigo tatulka za „starej Polski” miyszkali we Rudzie Ślonski a drudzy we Zobrzu we Niymcach i po łobu stronach chopy byli we fojerwerze, a co łoni godali, to sie ani we gowie niy mieści! Kożdy tydziyń sie na bank we Niymcach abo we Polsce poliło i fojermony ze zagranice ze swojom sikowkom, co jom ciongły konie, jechali na pomoc. Na granicy ich dycki przepuszczali bez kontrole, a we banioku krom wody były wuszty, gorzoła a roztomańte insze rzeczy, co szło Niymcom sprzedać abo dobrze wyhandlować, a nazod do Polski po prożnicy tyż sie niy jeździło!
Ło kowolach a hutnikach napisza przi innej prziwiliji, ale ło kominiorzach, czamu ni?
U nos kejś kominy wymiatoł chop, co ni mioł ani jednego włoseczka na gowie! Jak się go kerzi pytali, co mu sie stało, łon dycki sie łośmioł, a padoł, że jak był modym kominiorzym, to rod bez komin mode baby a frelki podpatrowoł i jedyn roz zazdrosny chop łod jednej taki istnej wciep do komina zapolony wiechetek słomy i wszyski włosy ze gowy, brewy a rzynsy mu spolił!
Jo myśla, że jak by to była prowda, to by sie tym isto tak niy kwolił, co myślicie?
Komentarze