Ciotka Yma to była nojstarszo siostra łod mojigo starzika. Nigdy żech i niy widziała, za to wielach ło ni słyszała. Miyszkali se ze ujkiym Hanikiym we Koloniji za lasym a wszyndy mieli daleko, nawet do samego kościoła było ze łoziym kilometrow! Bezto kupili se Siwka a landałer, taki ze rozkłodanym dachym. Dycki jechali do kościoła ze dzieckami na łostatnio mszo, na dziewionto. Ale wtynczos jejich somsiady Paulek a Paulka Studniki mieli na siodmo rano mszo na Złote Gody i ciotka ze ujkiym wyjechali ze chałpy, jak sie szarziło. Yma oblykła se swoji nojnowsze a nojdroższe szaty ze zielonej wołny setki, bo ni miała jeszcze prziwiliji sie w nich poparadzić. Jak szła nazod łod komuniji, zdało się i, że wszyjscy ludzie we kościele za nią jakoś świdrzom, ale potym se pomyślała, że to musi być skuli tych piyknych szatow, a niy zawracała se wiyncy gowy.
Przed kościołym ujek ze ciotkom pogodali kwila ze jubilatami, a potym gibko siodali do bryczki, bo dziecka łostały w doma yno ze Neżkom, co u nich służyła. Yma boła sie, że te starsze synczyska tyj dziołchy niy posłuchnom i co nawywijajom. Ciotka już stoła na schodku, kiej jom za rynka chyciła jedna znajomo baba ze miasta.
– Yma, jakoż to chodzicie? – dziwowała sie. – Eli by to miała być nowo moda, taki szaty wystrziżone ze zadku...
Ciotka gibko sie zwyrtła, ale nic niy uwidziała, jednako ujek, co tyż ta godka słyszoł, zaroz przikrył ciotki swojim szakietym, a tej istnej podziynkowoł za to, że ich upomniała.
Yma sie cołko droga gorszyła, ale niy umiała prziść na to, gdo by i taki konsztik wystrugoł, dziepro w doma sie i spomniało, że kajś już taki konsek sztofu widziała. Skoczyła jak sornik do izby, kaj spały dziecka a była w doma! Jedyn ber łod jejich nojmłodszego synka Bynusia mioł zielone szaty! Niy dali jak we zeszłym tydniu bajtel jom pytoł ło zielono szmatka do szycio, bo se rod groł na krawca, a łona mu padała, że może se wziońść konsek tyj resztowki, co leży na dole we szranku... Yno, że roztomiły syneczek siongnoł troszka wyżyj a urżnoł konsek mamulczynych szatow, bo mu tak prawie pasowało!
Bynuś dostoł po dupie i krawcym niy łostoł, yno... misjonarzym!
Komentarze