Ło piastowaniu kwiotkow

Jo kwiotkom łogromnie przaja, bezto mom ich niy yno na zegrodce, ale tyż na łoknach a na łobrozkach, coch ich pora lot nazod namalowała. Nikerzi se myślom, że do piastowanio kwiotkow niy trza żodnej proce wsadzić: styknie flanca wstyrczyć do ziymie a prziklepać! Potym słoneczko jom łogrzeje, dyszcz podleje, a łona sama urośnie, a poźni zakwitnie, ale to ni ma prowda! Jak chcesz mieć piykne kwiotki na zegrodce, to musisz wele nich robić, a łone ci sie potym łodwdziynczom a bydom kwitły cołki lato, a nikere zorty tyż na podzim.
A pamiyntocie zegrodki łod naszych starkow? Czego tam niy było!
U moji starki „na działkach” nojpiyrsze zakwitły dycki piotrowe kluczyki, potym poczontkiym maja konwalie, jeszcze poźni serduszka, piwowonie, margaretki, roże, floki, malwy, jorginy, astry, a na som koniec dombki! Jak żech była bajtlym, to mi sie zdało, że to je nojpiykniyjszo zegrodka na świecie, bo u somsiadow taki piykne niy były, ale to było bezto, że człowiek już za modu tym kwiotkom przoł, a jo sie tyj ważnej rzeczy nauczyła łod moji starki!
A spominocie se te łokna, kaj wielgi merty, oliyjandry, ruzyndle służyły za gardiny? U nos na łoknie stoły tyż myjsze kwiotki: kokotki, pokrziwki, tłuste kurki, alołes, co pomogoł na roztomańte choroby i dycki mioł nojwyżyj trzi liści, bo starka go rozdowała kożdymu, gdo yno chcioł! U naszej somsiadki – paniczki Waleski – na łoknie panoszyły sie piykne fuksyje roztolicznej farby a wielkości. Tam, kaj kwiotkow niy było, łokna wyglondały markotnie, choćby tam nojpiykniysze gardiny mieli!
A daliście pozor na te wszystki „boże mynki” a kapliczki? Downi podwiel były kwiotki na zegrodce, to tam tyż stoły we zbonkach, krałzach a blumwazach, a dycki świyże, a terozki yno wszyndy som sztuczne kwiotki, co roz-dwa wypłowiom, jak som na słońcu, a potym zamiast łoksztołcić, to raczyj straszom!
Dzisio ludziom brakuje czasu, bezto na zegrodkach momy same „iglaki” a trowniki. Na łoknach doniczek tyż już ni ma, bo kwiotki wymagajom flyjgi, a po robocie kożdy je rod, jak łobiod nawarzi a trocha se dychnie! Piastowani kwiotkow mu ani do gowy niy przidzie, jednako bez nich je we chałpie markotno.

Komentarze

Dodaj komentarz