Jak mi było bez dwadzieścia lot, zaczłach robić we jednej państwowej instytucyji. Mieli my tam łogromnie fajnego szefa. To był starszy panoczek, coby mog być mojim łojcym, ale sztyjc niy wiedzioł se dać rady a dycki sie pytoł ło wszystek swoji sekretarki, paniczki Alicje. Jo i jeszcze jedna kamratka, my śniom siedziały we jednym biurze a wszystek my dycki słyszały.
Jedyn roz ze samego rana szef nerwowy wparził do biura, bo mu sie spomniało, że mioł lecieć do panoczka Przewodniczącego, ale nasza Alicka padała mu, że to trefio dziepiyro jutro.
– Kerego dzisio momy? – spytoł sie.
– Dwadziestego szczwortego... – zgodnie ze prowdom łodpedziała sekretarka.
Szef klacnoł sie rynkom we czoło:
– Dziołszki roztomiłe, jo całkiym przepomnioł, że moja ślubno mo dzisio urodziny! Po gyszynk niy zdonża, Alicko, mosz sam piniondze, a poślij kero dziołcha do sklepu, niych i kupi piżama, a jak styknie, to jeszcze jaki kwiotki... – a za kwilka go niy było!
– Iwonka, ty skocz, żeś je starszo a lepi se poradzisz! – padała Alicka a dała kamratce piniondze.
– Pani Alicko, ale jo niy wiym, jako ta szefowo je... – zastarała sie dziołcha.
– Ze figury jak Mynorczyno ze ksiyngowości, yno troszka myjszo! Abo wiycie co, dziołszyska lećcie łobie! – rozkozała Alicka, a my sie drabym zebrały na miasto.
Łobleciały my cołki rynek, ale we żodnym sklepie ni mieli taki wielgi piżamy, dziepiyro jedna baba poradziła nom taki mały sklep na łosiedlu. Drogi był kawał, ale sie łopłaciło, kupiły my gryfno, różowo piżamka ze szpickami. Sprzedowaczka jom gratis jeszcze piyknie zapakowała do celofanowego bojtla, yno nom na te kwiotki wiela niy łostało, ale łod czego miały my gowa? Jo natargała na swoji zegrodce szlajerow, co ich starka dycki dowała do pukietow a zaniosły my to do kwiaciarnie, a tam wyrychtowali pukiet jak ta lala! A jedyn panoczek, co wloz za nami, tyż chcioł taki, bo mu sie te szlajery fest widziały!
Na drugi dziyń nasz szef prziszoł taki rozanielony a łod proga wołoł:
– Dziynki dziołszki, moja była łogromnie rada, yno czamu ta piżama miała taki krotki lajb a ku tymu jeszcze galoty? Jo chcioł tako, wiycie, dugo do ziymie, ze rynkowami...
Komentarze