Hanek wzion se ta nojpiykniejszo dziołcha w naszyj wsi: spaśno, na gymbie czerwono, ale po ślubie to mu sie hneda przestała podobać! Chałpa, niy powiem, łobrzondziła, ale warzić niy była nauczono!
Hankowo mamulka dycki godała, że jak miynso je mode, to sie nawarzi, a Hankowej Rozalce sie miynso dycki zwarziło, czy stare, czy mode. Dała go do zupy, to sie w zupie straciło. Jak go piykła, to sie spiykło i została sama zołza. Poszoł Hanek do mamulki po rada, a łona mu padoła tak:
– Wiysz Haneczku, musi ci ta twoja Rozalka to miynso zjodać, bo to niy może być... Coś tu niy sztimuje!
Przyszoł Hanek do dom i pado:
– Jutro je niydziela, to byda warził z tobom, babeczko!
Na drugi dziyń łoba stojom nad gorkiym, patrzom: zupa je elegancko, miynso warzi sie już pół godziny a nic go niy ubyło.
– Źle – myśli se Rózalka – chop pozno, że go cygania, ale jo dycki mom taki smak na te miynso, że ni moga, a potem do Hanka nic niy łostanie, do mi łon teroz do... ale przyszło i coś do gowy i pado:
– Haneczku, skocz do pywnice po kiszono kapusta, bo jo żech przepomniała, a miynso bez kapusty to niy ma jodło do chopa...
Haneczek skoczył, a jak przyszoł za śćwierć godziny, bo szukoł gorka, coby ta kapusta nabrać, to już miynsa w zupie niy było.
Pado mu Rozalka:
– Widzisz Haneczku, zaś żeś niy uwachowoł, prawie jak żeś poszoł, to miynso sie zaczyno tracić!
Hanek nic niy łodpedzioł, ale za tydziyń zaś warził ze Rozalkom.
– Źle – myśli se Rozalka – trzeba by sam kaj posłać Hanka i pado:
– Haneczku, przyniyś mi śmietonki ze pywnice, bo zołza bez śmietonki...
– Dobra babeczko, ale ty bydziesz klackać rynkami, to byda wiedzioł, że tego miynsa niy zjysz!
– Dobra chłopeczku! – i zaczyna klackać.
Hanek poszoł do pywnice, a Rozalka zaś se myśli:
– Źle, to już mie Hanek chytnie na cygaństwie, ale jo za to ni moga... – ale wpadł i do gowy dobry pomyślunek.
Dźwigła kiecka, a wtedy jeszcze baby bez galotkow chodziły, i wziena sie klackać jednom rynkom po gołym zadku, a drugom miynso z gorka wyciongła!
Klacko sie i klacko, co nojgłośnij, coby Hanek w pywnicy słyszoł, no i noreszcie i chop uwierzył, że sie miynso w zupie straci, a w zołzie spiecze.
Komentarze