Dycki sie tacy ludzie znojdom, co radzi robiom klachy! Uszy szpicujom, jak yno kery co muknie, reszta se przimyślom, a potym miyndzy ludziami rozpuszczajom taki gupoty, że sie to niy trzimo ani kupy, ani d...y! Jak trefiom na mondrzyjszych łod sia, to im ci istni co na rozum pedzom i je po godce, ale wiynkszinom ludzie sie ani niy zastanowiom nad tym, co słyszeli, yno sprzedajom dali, a potym sie tłumaczom, że jak kupili, tak sprzedali, yno że te rewelacyje kupili na lichym sztandzie!
Te wszystki klachule a klachocze dycki zaczynajom swoja godka tak:
– Wiysz, słyszałach... Co prowda jo tego niy widzioł, ale jedyn istny mi to padoł, a to je chop, co mu idzie wierzić... Bezmała tak to było... Eli je to możliwe, sami se łocyńcie... ale jo myśla, że je to prowda!
Kupa nagodajom, ale mało we tym rozumu! My tyż niy som bez winy, bo radzi taki pierdoły słuchomy abo czytomy, samach sie na tym chytła! Te wszyski kolorowe babski gazety to tyż som taki klachule, bo piszom niystworzone rzeczy ło ludziach, co ich ani niy znomy abo co nojwyżyj we telewizorze my ich widzieli. Żodyn snas przeca niy wiy, eli je to prowda! Jakby mi kery taki numer wystrugoł, to bych sie wkurziła, ale insi nic se stego niy robiom, yno godajom, że to je cyna sławy! Za tako sława to jo raczyj podziynkuja, ale zatym mi to niy grozi, bo mie co nojwyżyj moji czytelnicy ze „Nowin” znajom! Myślołby se kery, że klachy na konkuryncyjo robia, ale musza prziznać, że we wszystkich tych gazetach czasym tyż co dobrego człowiek wyczyto: jaki porady prawne, co nowego ło starych chorobach abo jak sie policzyć ze fiskusym za zeszły rok!
Myśla, roztomili, że we kożdej plotce je jednako ziorko prowdy, chocioż czasym je taki maluśki, że go ani pod mikroskopym niy widać!
Polocy godajom, że „słówko ptaszkiem wyleci, a powróci wołem”! Taki klachy ze „grubej ruły” tyż nikedy sie zdorzajom, a potym tyn istny, co te słowko ciepnoł, za gowa sie chyto abo za nos pociongo, że taki gupi był, a co kerymu padoł! Bezto, jak chcecie mieć świynty spokoj, to trzimejcie sie z daleka łod ludzi, co wiedzom nojlepij kaj co warzom, yno pojyncio ni majom, czym zasmażom...
Komentarze