Piyrszy roz pojechałach na wycieczka do Zakopanego, jak mi było piytnoście lot. Ani bych tego możnej tak dobrze niy pamiyntała, ale to było we tym czasie, kej Amerykany landowali na miesionczku. Turysty łazili po mieście, a jedyn drugigo sie pytoł, ło kerej bydzie ta transmisyjo a kaj podzie sie dziwać na telewizor, bo we tych czasach jeszcze we niykożdej chałpie go mieli. Nasza gaździnka aparat miała yno jedyn, ale drugi kajś pożyczała, bo se mieniła tak, że przi jednym se siednom chopy, a przi drugim baby a starsze dziecka, ale krom nos były tam jeszcze dwie wycieczki, jedna ze Bytomio, a drugo ze Warszawy i wyrychlone chłopiska już wczas we wieczor łobsiedli łoba telewizory a zaczli popijać! Przi gorzołeczce nawet te rychtik prawe Ślonzoki ze Bytomio skamracili sie ze tymi nojprawdziwszymi Polokami, co ich jeszcze pora godzin nazod przezywali „gorolami”. Tego ni mogła spokopić nasza gaździnka: Bo co to som za gorole, co we gorach niy żyjom?
Potym już żodyn, krom myńszych dziecek, spać niy szoł. Baby siedziały przed chałpom ze paniczkom gorolkom, a potym jak sie zrobił wiynkszy ziomb, to poszły do izby a dali se berały ło beleczym. Ło wyznaczonej godzinie poszli my ze bracikiym do izby, kaj był telewizor, ale tam ani wlyźć niy szło! Jedyn fest naprany chop poradził mi na głos, cobych tego łebonia (mojigo bracika!) pognała spać, chycił mie za rynka a chcioł posadzić na swój klin, ale bracik sie na niego postawił, chocioż mu yno trzinoście lot było! Haja wisiała we lufcie, ale my gibko uciykli na dwor, a kamraci jakoś łozyroka uholkali, bo chcieli transmisyjo łoglondać. Landowani na miesionczku łobejrzałach ze dworu bez łokno, jak reszta babow a dziecek. Potym my poszli spać, ale ze chopami to było troszka gorzi, bo do rana łazili! Już sie rozwidniało, kej do naszyj izby, kaj spało wiyncy ludzi, wlecioł bez łokno panoczek Jorguś ze wrzaskiym, że Armstrong u gorola za stodołom wylandowoł, ale ni mioł miynkigo landowanio jak Amerykony, yno łogromnie sie potrzaskoł!
Rano na gory poszły yno baby a dziecka, bo chopy kaca do wieczora lyczyli, a panoczkowi Jorgusiowi do dzisio kamraty Armstrong godajom!
Komentarze