Piyrwej jak sie najmowało ludzi do roboty na polu, to trza im było dać jeś aż sztyry razy do dnia: śniodani (dzisio by my padali drugi śniodani), łobiod, sfaczyna i wieczerzo. Bo inakszy to do roboty sie niy brali, a jak kery gospodorz był chamiaty i posłoł robotnikow bez połednie do dom na łobiod, to już potym nazod niy prziszli i robota stoła! Jodło, co dostowali żniwiorze abo ci, co kartofle kopali, było taki same, co w doma: żur, troszka lepi łomaszczony, kartofle abo pogański krupy ze kiszkom, bo mlyka na gospodarce było zatela! Czasym nawarziło sie jajec, po dwa do kożdego. Na śniodani abo na sfaczyna dowali tyż chlyb ze biołym syrym. Jak moja mamulka szła na łodrobek do chopa, co na naszym konszczyczku pola robił, to tam był na sfaczyna swojski chlyb ze biołym syrym i dycki nom, dzieckom, po krajiczku prziniosła, bo taki był dobry! Jak my go roz starce łod gospodorzow pokwolili, to łona nom zdradziła ta tajymnica, czamu był taki dobry: do syra dowało sie troszka cynamonu! My tyż próbowali tak zrobić, ale taki dobry niy był! Nasz tatulek godoł, że to je nejści skuli chleba, bo nasz my kupowali we piekarni!
Jak sie robota kończyła, to na łostatnio sfaczyna gospodyni upiykła kołocza ze posypkom, a nawarziła kakałszali abo malckawy. Jak trefiło, że łostatni dziyń ludzie robili do wieczora, to potym była lepszo wieczerzo i po kieliszku gorzołki, bo trza było mieć robotnikow we poszanowaniu!
Roboty na polu dycki było pełno aż do Adwyntu, ale jak sie zaczynało gibci robić cima, to sie już sfaczyny niy dowało, yno wieczerzo abo gospodorze dowali wieczorne jodło ludziom do dom. Stond sie wziyno przisłowie, że świynty Michoł (29 września) sfaczyna skichoł!
Komentarze