Czamu chopy majom „japko adamowe”

Jak Ponboczek stworzoł świat, to zaczon łod myjszych rzeczy, a potym robił coroz to wiynksze. Jak już mioł roztomańte stwory a zwiyrze, pomyśloł ło czowieku. Mioł szczyro nadzieja, że ludzie to bydom te jego nojlepsze stwory, ale sie łoszydził. Nejści stało sie tak skuli tego, że im za wielko zwolo doł a wyrychtowoł do nich wszystek co nojlepsze. We tym Raju, co go Ponboczek stworził do piyrszych ludzi, czyli do Adama, a jego baby Jewy, wszystek było łogromnie piykne: kwiotki, rzyczki, łonki a nojbardzi stromy. Nojpiykniyjszy strom stoł we samym pojstrzodku tej wielgi zegrodki, ale Adam ze Jewom niy śmieli śniego urwać ani jednego jabka, bo Ponboczek im zakozoł. Jewa sie już tam wiela razy wele tego stroma krynciła, ale sie boła, co wymajstrować, aż roz miyndzy liściami ujrzała takigo wielkigo gada, co godoł po naszymu i łon jom skusił do grzychu! Musza prziznać, że Jewa łogromnie Adamowi przoła, bo niy zjadła jabka sama, yno konsek mu łostawiła.
Wiym, co tam chopy godajom, że chciała, coby tyż konsek jejigo grzychu przeszoł na Adama, ale tego niy suchejcie, łoni tak dycki nasprzyk!
Niy wiym, eli te japko było tak fest dobre, abo Adam był taki chamiaty a boł sie, że bydzie sie musioł podzielić ze Ponbóczkiym, dość że jak łujrzoł, że Ponboczek prziszoł ich nawiydzić, to złykł wszystek, co mioł we gymbie, ale łogryzek był taki wielgi, że mu stanoł we karku, a do dzisio tyn znak kożdy chop nosi! Godajom mu „japko Adama” abo bardzi naukowo – grdyka!
Mój somsiod, Poldek, dycki godoł, że borok Adam musioł potym ciyrpieć za gupota swoji baby do końca żywota! Łon ani przeca niy targoł tego jabka, yno wzion, co mu baba dała, jako dycki, jak łobiod nawarziła! No, to łon zjod, co dała, a co mioł robić? Jakby spróbowoł, co pedzieć, toby był łogiyń na dachu a haja na cołki Raj, tyn łod Ponboczka, niy tyn wele Żorow! Z jego godki dycki wynikało, że ciyrpieć miała yno Jewa, bo to łona naszkłodziła, ale Ponboczek ze jakisi prziczyny podzielił wina na poły!
Nikerzi to poradzom wszystek łokryncić!

Komentarze

Dodaj komentarz