Duch przi studni

Terozki to ludzie se myślom, że taki przipadki sie yno downi zdorzały, sto-dwiesta lot nazod, ale ducha mogymy spotkać wszyndy, a na dodatek i we takich miejscach, co sie ani niyspodziywomy, że nos cosikej może postraszyć! Poczytejcie se, co sie zdarziło już po drugij wojnie we Baranowicach.
Kupa chałpów było poniszczonych a popolonych, to ludzie belekaj miyszkali: we chlywach, stodołach, starych magazynach, a czynsto tyż komorom u znajomków abo przocieli. Niyroz po woda tyż trza było daleko chodzić. Jedna familijo brała woda ze studnie wele starej szkoły, co sie bez wojna wypoliła, a nigdo tam niy miyszkoł.
Prziszła sobota i wszyski synczyska we chałpie polecieli pod wieczór na muzyka, a matko łostała bez kropki wody na niedziela, bezto jak jedyn z tych karlusów prziszoł do dom przed północom, matka zaczyna mu czytać lewity.
– Niy gorszcie sie mamulko! – łodpedzioł synek, wzion kible, a po ta woda polecioł, chocio to był pojstrzodek noce.
Już był wele studnie, kiej posłyszoł jakiś szuszczyni, co szło łod spolonej szkoły. Podziwoł sie tam i aże sie przelonkł: wzduż ściany szeł niywielki chopek, godoł coś do sia abo spluwoł.
– Ki pieron chce mie sam postraszyć! – zaklon głośno karlus a porwoł sie z kiblym na straszka.
Jednako jakoś wielgo siła łodciepła go na bok.
– Ki pieron... – mody zaklon po drugi a zaś ciepnoł sie na chopka, bo se myśloł, że to mu kamraty robiom szpasy, ale tym razym siła była jeszcze wiykszo: kibel fronknoł aż ło studnia.
Trzeci roz synek już niy próbowoł. Naciongnoł wody, naloł do kibli, a caluśki czos dowoł pozor na tego straszka, a tym se spokojnie skończył swoja droga wele muru a stracił sie jakby nigdy sam niy był.
Mody prziszoł do dom, a łopedzioł to matce. Łona dugo myślała nad tym, gdo by to mógł być, ale nic mondrego i do gowy niy wpadło. Hnet na drugi dziyń godała ło tym somsiadce, a ta i padała, że kupa lot nazod miyszkoł tam taki starzik, co był chory na tubera. To był richtik dobry człowiek i ta baba niy poradziła spokopić, za co by pokutowoł?
Wieść sie rozeszła gibko po wsi, a młode karlusy jak se popili, chodzili tam we nocy straszka łoglondać, ale żodnymu sie niy pokozoł.

2

Komentarze

  • Elzbieta straszki 19 listopada 2013 20:58wspaniale napisane Grymlino!Jo zyz Was rada czytom-dalij prosza piszcie!
  • Jedna baba ze ŻORÓW Straszki 01 listopada 2013 11:39Na kożde zaduszki wy nos Grymlino rada straszycie, a jo to łogromnie rada cytom. Szkoda, że yno roz za rok, boto je lepsze niż nikere filmy we telewizorze.

Dodaj komentarz