Na budowie postawili blaszano buda, kaj sie chopy ze naszej firmy mieli przeblykać do roboty i wszystek byłoby piyknie, ale łoroz gruchła godka, że sie w ni zalongły szczury. Co prowda widzioł ich yno Francik Koberlik, a łon był wiyncy nabelany niż czyrstwy, bezto mu żodyn niy uwierził! Jednako nasz majster „tak na wszelki wypadek” prziwiesił na dźwiyrzach kartka, kaj stoło: Pozor na szczury! I ludziska jak niy musieli, to tam niy włazili.
Miało to tyż swoji dobre strony, bo sie szło tam przedrzimać, a szef cie niy widzioł!
Bez karnawał modzi radzi balowali i jedyn roz we pyndziałek nasz mody majster prziszoł do roboty cołkiym wczorajszy. Bezto woloł sie niy pokazować szefowi na łoczy, a coby niy podpaść, wzion papiury a poszoł do budy niby coś tam pisać, ale długo niy wydzierżył, łoczy mu sie same sklapły a usnoł! Łoroz słyszy, że gdoś klupie na dzwiyrze. Skoczył na rowne nogi i z miejsca zaczon ryczeć, jakby go zbijali, bo ze jego nogawice nojprzod wyjrzoł czorny nos, potym pokozały sie dwa czorne ślypka, jak różańcowe pociorki i za moment na delowka wyskoczył mały, puklaty szczurek! Majsterka mało krymfy niy chyciły! Nojgorsze, że wszystek to widzioł Koberlik, a potym rozprowioł kożdymu (eli tyn istny chcioł go słuchać abo niy) jak to sie stało, że dwumetrowy chop wylonkł sie takigo maluśkigo stwora!
Teroz nasz blaszok szły łoglondać cołki procesyje, chopy ze somsiednich budowow tyż, bo kożdy chcioł widzieć tego boroka (szczura, niy majstra!), co sie tam skludził. Coby zwiyrz niy podł ze głodu, dycki mu tam co we kontku łostawili i łon sie tak rozpaskudził, że chleba bez bajlagi to sie niy chytoł! A wuszty mu podchodziły yno te wyndzone! Tak to szczurek na budowie mioł swoji „piyńć minut”, ale za trzi miesionce buda zebrali a prziniyśli na inszo budowa. Chopy mieli nadzieja, że sie śnimi przekludzi tyż jejich szczur, ale we nowym miejscu już sie we budzie niy pokozoł. Bez cołki tydziyń wszyjscy łazili markotni, jakby im kamrat umrził, ale potym zapomnieli...
A dzisio chop ze starej budowy godoł, że we jejich blaszoku pokozoł sie taki frechowny a wypasiony szczur, co mo rod yno wyndzony wuszt!
Komentarze