Wiycie roztomili, że czym żech je starszo, to mi sie zdo, że tych syniorów je wiyncy jako kejś! I możnej je to prowda, bo we gazetach trombiom, że nasze społeczyństwo sie starzeje. Jo se jednako myśla, że ze tym je tak jak ze tymi babeczkami, co sie malika spodziywajom – wszyndy widzom baby ze brzuszkiym abo ze wozykiym! Choć mi je bez piyndziesiont lot, to do tej pory żech se wcale niy myślała, że jo sie tyż pomału byda ku tym syniorom zaliczać, ale niy dali jak we zeszło strzoda byłach u doktora. Do rejestracyje była dugo raja, bezto trza było troszka poczkać. Za mnom stanyła tako modo mamulka ze dwiema bajtlami. Syneczkowi mogło być ze siedym-łoziym, a dziołszka trzimała na rynkach. Tyn synek sie caluśki czos kryncił, jakby mioł szydła we galotach, a za kwila ta maluśko zaczła płakać, że chce „siku” i mamulka łostawiła synka we raji, a sama szła szukać „toalety”. Za moment prziszła do rejestracyje jeszcze jedna flyjgera, pozbiyrała dyskietki łod tych, co szli do ortopedy i troszka sie we raji namiyszało! Jedyn starszy chop chcioł tego syneczka wyciś, ze niby tu niy stoł, no to mały sie rozdar:
– Ja stałem za taką babcią w niebieskiej kurtce!
– Podziwej sie syneczku, sam taki ni ma! Gupoty łozprowiosz! – dali go przeganioł starzik.
Zanim żech dała rady sie łodezwać, syneczek chycił mie za rynka a wrzasknoł do starzika:
– Tutaj jest, tutaj! Widzi pan teraz?
– Ty se sy mie strojisz szpasy, ty najduchu ! – wkurził sie starzik. – Jo se myśloł, że godosz ło jaki richtycznej omie, czamu żeś niy godoł, że mosz tako modo babcia!
Jo już ani niy łobjaśniła starzika, że to ni ma mój wnuczek, chocioż rychtik sam stoł, bo prziszła moja raja do łokiynka, ale potym jak żech se siedziała pod gabinetym łod doktora, to żech dugo nad tym myślała a prziszła żech na to, że to wszystek zależy łod tego, kery nasz wiek łocynio. Do starzika, coby mog być mojim łojcym, była żech jeszcze modo, ale do takigo bajtla, co ledwie napoczon do szkoły chodzić, to i „dwadziestka” by była staro, a co dziepiyro baba praje trzi razy starszo!
Nojważniyjsze jednako je, jak my sie czujymy! Jo sie czuja porzad modo, a Wom życza tego samego!
Komentarze