W tyn dziyń tyż ni mogło sie obyńść bez babskigo combru. Tak sie godało na wielko muzyka dlo wszystkich babow z okolice, na kero z wielkom chyńciom łone przichodziły. Od samego rana chodziły poprzeblykane baby po wszystkich chałupach, kerymi reskiyrowała nojbardzij pyskato i nojważniejszo ze wsi, żeby zaprosić na muzyka cołki babski „nosiyni”. Miała w rynce wielko drzewianno warzecha abo zgrzebło, kerym po dźwiyrzach butlowała i łoznojmiała o babskim combrze, a reszta tych poprzeblykanych i pomalowanych po gymbach bab pomogało tyj „rajmondzie” wielkim larmym i głośnym śmiychym.Babski comber był fajrowany w szynku na sali, kaj przigrywała łorkiestra posztelowano przez babski „komitet”, do kerego te nojwiyksze prowajderki ze wsi były wybrane. Łone tyż w tyn dziyń były nojważniejsze i chopy ni miały nic do godanio. To łone muzykantom kozały grać wybrane przez sia konski do tańczynio, czynstowały gorzołkom, kero polywała do kieliszkow ta nojważniyjszo „rajmonda”.Zaproszały tyż te baby chopow na tyn babski comber, ale tak łacno ich niy wpuszczały do sale. Nojprzod baby pozbiyrały im czopki, huty, czasym i szakety, i musieli chopy te zebrane fanty wykupić. Nojwiynkszo uciecha miały, jak wpuszczonym do sale chopom zaczły obrzinać bindry i strojić nimi drzewianny sztynder przi szynkwasie. Chichranio przi tym było i śpiywanio na poczekaniu wymyślonych prziśpiywek, co niymiara.W babski comber tyż te prowajderki – a były to baby z bogatym doświadczyniym małżyńskim – pouczały młode dziołchy, co jak majom robić, a czego sie niy śmiom wcale chytać i jak majom z karlusami postympować, żeby go przed ołtorz dokludzić. Dawiadowały sie przi tym niyroz takich rzeczy, o kerych nikere wcale pojyńcio ni miały. Nojbardzij tyż były napasztowane stare frele, kere za sztrofa musiały miyndzy sobom mietlorza tańczyć.Babski comber był dycko huczny, wszyjscy błoznowali i śpiywali: „Kiej łostatki, to łostatki, niych sie trzynsom babski zadki”.Kończył sie babski comber, tak jak wszystkie śledziowe muzyki na Śląsku o połnocy „grzebaniym basow”, przi ogolnym lamyncie, kropiyniu instrumyntow gorzołkom i śpiywaniu śpiywek żałobnych, co znaczyło, że prziszoł czas postu.
Komentarze