Farbować abo niy?

Jo już doś pora lot wosy farbuja, chocioż tego niy pokwolom, bo farby wosy niszczom, ale co ze tego, jak we robocie nasze dziołchy na mie nawrzeszczały, jak żech yno spomniała, że zamiaruja siwo chodzić:
– Czyś ty babo zgupiała, lot se dodować! Przecaś ni ma jeszcze tako oma, jako chcesz udować!
– Nale, dziołchy, mie już to przistoji, starkom jeżech już sztyry lata!
– Ta dali swoji! – wkurzyła sie na mie Zuzka. – Niy styknie ci, że mosz bryle, co ich nosisz bez cołki żywot? Ku tymu teroz chcesz mieć siwy łeb? Wnuczka cie sie wylynko! Teroz niy som te czasy, jak u nas za modu! Mój bracik, chcioł mieć oma siwo, we brylach a ze dudlikiym ze zadku gowy, bo tako kajś widzioł na łobrozku we ruski ksionżeczce, a nasza starka wtynczos robiła na banie a we uniformie chodziła!
– A widzisz, jo bych tako starka była! – łodpedziałach i, coby sie śniom troszka podroźnić.
– Ja, yny dzisio wszyski starki som mode a gryfne – łodezwała sie Wandeczka, co siedziała przi łoknu.– a w mini chodzom, jak niy przimierzajonc jo! – łośmioła sie.
– Bo czym babska starsze, tym gupsze! – warknoł Ludwik, co mioł biurko wele ni. – Wady jak rolady a kitasy jak balerony a wszystek na wiyrchu, fuj!
Wandeczka sie wkurzyła na tako godka:
– Myślołby kery, że Ludwik, je przeciwnik mody, a samach widziała, jak sie za takimi kitasami na drodze łoglondoł!
– Yno, że te kitasy były mode jak cielyncina! – Ludwik frechownie sie roześmioł i praje za to wsiadła na niego Zuzka:
– A ciebie to co, w dupie sie po przewracało? Pionto modość ci sie wrociła? Ze babow sie śmioć, a swoj łeb łodsiwiaczym mazać, myślisz, że niy wiym skuli czego twoja baba bez przerwy te zegowki piere, a i tak som siwe?
Ludwik na to nic niy łodpedzioł, yno strzelił do dźwiyrzy a szeł robić inspekcyjo, boroki te ludzie na budowie, ale sie im potym dostało, chocioż niczymu winni niy byli!
Skuli tej zwady momy teroz we biurze „ciche dni”. Żodyn sie niy łodzywo a wszyjscy patrzom na sia bykiym , a jo, Roztomili, dali niy wiym, eli te wosy mom se farbować abo ny?

Komentarze

Dodaj komentarz