Co tak śmierdzi?

We jednej robocie miałach fajnego kierownika, panoczka Kazika. Tyn chop, bezto był takim dobrym szefym, bo nigdy ni mioł czasu, a niy szukoł dziury w cołkim! Jedyn roz jak, jego baba miała urodziny, zapomnioł i kupić podarunek a pytoł jedna nasza kamratka, coby mu skoczyła na rynek do „Pewex-u” a kupiła jaki piykny parfin:
– Pamiyntej, dziołcha, coby był żołty, bo moja baba yno taki mo rada!
My zgupiały: ani niy padoł, jak sie tyn parfin mianuje, ani jako mo woniać... ale coż jego gyszynk – jego wola! Kamratka kupiła tyn nojżołciejszy: ruski „Duchi”, co łod niego szło paść trupym, taki łostry był, ale szef nic na to niy padoł!
Za tydziyń szefowo babeczka pojechała ze dzieckami na wywczasy do gorow, a pon Kazik łostoł w doma som ze swojim psym Szarikiym. Po dalszych trzech dniach dziołchy dały pozor, że nasz szef jakoś czymś zalatuje, choćby stynchliznom abo czym spleśniałym... a kożdy dziyń bardzi, ale żodno ni miała opowogi mu ło tym padać!
– Isto sie niy myje! – zawyrokowała kamratka Irma, co już pora lot była wdowom. – Mój stary tyż tak robił, jak jo mu nad uchym niy brzynczała! Ale na Kazika, że taki tyż je, to jo bych ani niy pomyślała!
We pyndziałek prziszoł ku nom jedyn kamrat ze magazynu, pojrzoł do szefowego biura a szeptym zaczon:
– Je szef? Ni ma? To dobrze, cosikej wom powiym, dziołchy, synsacyjo! Wczora była u moji mamulki szwigermutra łod szefa, a rozprowiała łokropne rzeczy, że łon społ cołki tydziyń ze smrodlawom kościom, co mu jom tyn jego pies pod zegłowek zaniosł! Wszyski poszewki a zegłowek trza było wyciepać, a izbow do wieczora niy wyluftowali, że tyż nic niy wywonioł?!
Na to sie łodezwała Irma:
– Teroz wiycie, skond sie wzion tyn smrodek, co za szefym łaził! A te kupowani żołtych parfinow, to ze nieba spadło? Tyn chop isto nic niy poradzi wywoniać, a my sie śniego, boroczka, śmioły! – lamyntowała, jakby cołkiym zapomniała, że łona te wynokwiani zaczła!
Kole połednia prziszoł do naszego biura pon Kazik czyściuśki jak płaczka a padoł: Niy gorszcie sie na mie za to, dziołchy!

Komentarze

Dodaj komentarz