Moja gowa abo jo?

 

 

 

We dalszej familiji momy takigo gryfnego karlusa kole trzidziestki, co mu je Feluś na miano. Tyn synek pokończył kajjaki fakultety i taki je mondry, że ciynżko mioł znojść robota, bo jak sie kaj pokozoł ze swojim CV, to sie dycki pytali, eli łon rychtik tela umi? Musza wom pedzieć, że synek ni mioł szczyńścio roboty dostać, bo jedni mu niy dowiyrzali, a drudzi boli sie ło stołki!
Ale tak ze trzi miesionce nazod Feluś wyczytoł, we gazecie, że je konkurs na stanowisko we jednej instytucyji, a łon tam dycki chcioł robić, bezto zastartowoł, chocioż nikerzi tuplikowali, że tam łogromnie ciynżko sie je dostać! Ale, gdo sie niy szancuje tyn niy zyskuje, bezto Feluś posłoł wszyski papiory tam kaj trza, a za miesionc dostoł ceduła, że sie mo pokozać na „rozmowa kwalifikacyjna”. Synek łoblyk se swoji nojlepsze bermudy, bo we połowce lipnia był łogromny hyc, a stawił sie wczas rano we Katowicach. Tam już czakało dzisiyńciu takich jak łon, ale wszyjscy byli we gangach, choć war loł sie ze nieba! Jedna dziołszka to nawet zymdlała, ale ani na kwila szaketu niy sjyna, yno padała, że to było z „emocji”! W końcu prziszła raja na Felusia. Oberszef komisyje spytoł sie go, kaj sie uczył, potym doł mu kupa fachowych zapytań i na koniec padoł:
– No, panie Feliksie jest pan szczęściarzem, proszę się zgłosić jutro o godzinie ósmej do pracy. Tylko w garniturze! – mrugnoł do niego a pokozoł gowom na baba, co siedziała wele niego.
Synek podziynkowoł, rozłonczył sie a czym pryndzy broł sie do dom. We chałpie skoczył do swoji izby a ze szranku wyciongnoł swoj gang, co w nim był łoziym lot nazod bracikowi za starosty. Cołki szczyńści, że jeszcze pasowoł, ale gorzi było ze koszulom, bo we takim szactwie łon niy chodził. Jednako spomniało sie Felusiowi, że mo „podkoszulek ze fotkom ze Nowego Yorku”, co w nim jeszcze nikaj niy był!
Jak sie na drugi dziyń taki wystrojony pokozoł swoji nowej szefowej, to jom mało hercszlag niy chycił!
– Jutro ma być biała koszulka i porządny garnitur! A te farfocle na głowie proszę obciąć!
– A gdo sam bydzie robił: moje dredy abo jo? – spytoł sie Feluś a zarozki doł wypowiedzyni!
Teroz synek robi u łojca przi autach.

Grymlino

Komentarze

Dodaj komentarz