Wele naszyj szkoły

Jak szkoła stawiali praje, że pod naszym łokym, bo kaj indzi placu niy było, a dziecka ze naszego łosiedlo kajś trza było pomieścić, to powiym wom szczyrze, że mi sie to łogromnie niy widziało, bo sztyjc kopali, płoty przewrocali, a my żyli jak na placu budowy, ale było, minyło…
Potym jak dziecka do szkoły we wrześniu prziszły, zaczyna sie utropa. Płot był niski, to bajtle za balym skokali do naszej cebule abo miyndzy tomaty, a wiela miyszkow ze papuciami było było we naszyj zegrodce, to sie ani we gowie niy mieści! Jo sztyjc musiała wyłazić ze chałpy, bo dziecka porzad na fortka dzwonili, a jak żodyn niy wyloz, to sami wleźli, po swoji graty. Cołko zegrodka zadeptali, a i tak mieli szczyńści, że ich nasz pies Lord niy użar! Jednako szło tymu zaradzić, stykło wysoki płot postawić! Teroz małokedy jaki bal wleci do zegrodki, chociaż na orliku grajom po całym dniu. To sie jednako niy widziało jednymu urzyndnikowi, bo nom porzad wypominoł, że jak we zoologu miyszkomy, tak gupie godoł, jakby my sie sami ło taki ucionżliwe somsiedztwo prosili!
Za tela lot to człowiek nawyk do do tego larma za płotym, a teroz dziecek we szkole je myni niż na poczontku, to je troszka ciszyj.
Jo za modu dycki lamyntowała, że do szkoły musza daleko deptać, bo aż na żorski rynek, a do gowy mi ani niy prziszło, że za pora dobrych lot byda miała szkoła za płotym, chociaż jo już do ni chodzić niy byda. Za to moji dziecka mieli do szkoły blisko, ale nikedy niy byli tymu radzi, bo jak co zbroili, to jo sie gibko ło tym dowiedziała!
Potym prziszły zmiany i zamiast jednej szkoły momy teroz za płotym aże dwie: podstawowka i gimnazjum! Na bezrok do tej szkoły tyż pojdzie moja wnuczka, bo trza rodzinno tradycyjo pod trzymać!
Jo se tam nasza szkoła kwola, bo zaproszajom mie naroztomańte szkolne uroczystości. Kożdego roku dostowom dyplom „dla przyjaciela szkoły”, za to, że im czasym co po naszymu napisza do kołka regionalnego. Dziecka rade w moich scynkach wystympujom, a jak mie widzom to porzad sie pytajom kej bydom dlo nich nowe teksty.

Komentarze

Dodaj komentarz