Jako to je ze wekslami?

Ło tym, że baby majom weksle nawet we gazetach piszom, ale jako to je ze naszymi chopeczkami, to sie mało godo, ale tego, co przeżyła moja kamratka ze swojim ślubnym, niy życzyłabych ani wrogowi! Chocioż to sie inszej babie przitrefiło, mie tyż zabolało...
Lidka miała łogromnie zgodliwego chopeczka i dycki se go kwoliła, a kamratki po cichu i zowiściły takigo „ideała”, ale wszystek do czasu...
Tak ze piyńć lot nazod Erwin dostoł „skierowani” do sanatorium, bo porzad stynkoł na rojmatyka. Jak sie yno ło tym dowiedzioł, tak zaroz łozdrowioł, nic go niy szczykało ani we krziżu a ni we kolanach a wesoluśki był jak szkowronek! Troszka to Lidce podpadło, ale Erwin i padoł, że sie tak raduje, bo sie noreście chorobska pozbydzie! Babeczka wyrychtowała mu łachy na tura a do koferka wcisła pora czekuladow, co ich tak mioł rod. I chop pojechoł do Ciechocinka. Bez cołki kurowani zadzwonił do dom yno dwa razy. Jedyn roz, jak mu kamraci coś tam niy uwierzili i kozoł swoji babeczce prziświodczyć, że godo prowda, a po drugi, jak mu piniyndzy brakło...
Co Erwin we Ciechocinku wyprawioł, tym sie Lidka niy interesowała, ale nikerzi, co śnim byli, godali, coby miała sie czego nasłuchać, ale nojgorsze jom jeszcze czekało!
Po przijeździe do dom roztomiły chopeczek zaczon zakludzać nowe porządki: dyjety, szpacyry po nocy, jakby dnia niy było, a porzad wyrczoł, że Lidka wszystek źle robi. Som se biglowoł koszule (to był jedyny pożytek ze tego wyjazdu!), spodnioki a podkoszulki kupowoł se teroz som a taki fickowate, że ledwie do nich sie wciskoł! Bo yno taki mu figury niy psuły, jakby po starziku, co je już trzeci rok na zasłużonej pynzyji, kery sie spodziywoł, że bydzie wyglondoł jak kulturysta?!
Lidka to wszystek ciyrpliwie snosiła, ale jak zaczon som jeździć na wycieczki po Polsce a kożdo sobota lotać na muzyka do drugi wsi, to sie roz przi mie zaczła sie uskargować na swój żywot, ale Erwina to mało łobchodziło!
Myśla jednako, że idzie u nich ku lepszymu, bo Erwin sie zapisoł na podzim do Uniwersytetu Trzecigo Wieku i teroz mo co robić!

Komentarze

Dodaj komentarz