– Tukej mosz piniondze, kere żech z wielkom biydom przi ciebie naszporowała (bo Francek postyk wszysko przetutać, znała go cołko wieś z tego, że se rod chlapnył) i pojedziesz na torg do Rybnika kupić prosia. Zimioki nom sie latoś doś podarziły, to bydzie go czym do wiosny kormić. Sprzedomy go na wiosna i bydom piniondze na gościna, przeca nasz Antoś pódzie do komunije. Wybier piyknego prosioka, niy takigo zachariosza, jakigoś łostatnio prziwioz i na dokłodka nabroł żeś mie na piniondzach, niy próbuj mie zaś ocyganić, bo potym szydło z miecha wylezie tak i tak.Francek sie w duchu zaroz ośmioł, jak yno to usłyszoł, wiedzioł dobrze, że na pewno mu sie udo coś na pyrtulka uszkubnyć. Rano wzion nowy miech, prziwionzoł do pekynhaltra i pobyndalowoł ku Rybniku, żeby u świnkorza wybrać nojtońsze prosia. Jak przejyżdżoł kole Gzelki, to se tak som ze sobom godo: Już bych sie musioł Francek niy nazywać, żeby mi piniyndzy niy stykło na wieprzka i na halbeczka, już Angelko ci piykne prosia prziwieza, niy starej sie...!Utopek, kery wszystko słyszy i niyjedno wiy, co sie na wsi dzieje i tym razym sie kapnył, o czym Francek godo. Przemiynił sie gibko w małego wieprzka i zaczon kwiczeć głośno w trowie kole przikopy. Francek, jak ujrzoł małe, różowiutkie prosia na łące, aże sie w lico uszczypnył, czy aby mu sie to niy śni. Zeskoczył gibko z koła i kalup na łąka. Utopek doł sie chycić, bo na to czekoł, wiedzioł, że u Angele w ciepłym chlywiku zima przeżyje i niczego mu brakować niy bydzie. Zima dycko jest gorzij przeżyć w takij przikopie, kero niyroz do dna zamarznie. Francek chyciył prosia, bo myśloł, że jakimu świnkorzowi, kery na torg jechoł, z woza uciykło. Uradowany był sromotnie, ale niy jechoł zaroz du dom, boby to podpadło. Wciepoł wieprzka do miecha i pojechoł do szynku gibko przepić.Wieprzek sie Angeli spodoboł i z radości ani sie nie pytała, wiela za niego doł i za co zaś tak sie utintoł. Utopek zaś z uciechom żar kiszony żur i pelkartofle okroszone śrotkom, przirychtowane przez Angela i radowoł sie, że tak dobrze trefiył. Ta zaś chodziła paradnie, mierziła wieprzka co sobota myjtermasym w krziżu i kożdymu pokazowała, jako to mo rynka do chowu prosiokow.Na wiosna wieprzek mioł kole trzech cyntow i z wielkom biydom zmieściył sie w klocie, w keryj Francek mioł go na sprzedoj zawiyźć. We czworka ze somsiadami na fora go załadowali.Jak był na mostku przi Gzelce, wieprzek zamiyniył sie w utopka i uciyk Franckowi z fory, ale doł mu pora groszy, żeby mioł za co wypić ze zgryzoty. Francek sie du dom tydziyń niy pokozoł, a jego Angela do końca życio mu niy wierziła w ta jego opowiostka o utopku.
Komentarze